رێکخەرێکی خۆپیشاندانەکان: عێراق بۆمبێکی تەوقیتکراوە هەرکاتێک بێت دەتەقێتەوە

SNN-

ئەمینداری گشتی تەیاری نیشتمانی عێراقی بۆ گۆڕانکاری، دۆخی عێراق بە بۆمبێکی تەوقیتکراو دادەنێت، پێیوایە ئەو بۆمبە لەهەرکاتێکدا بێت، دەتەقێتەوە.

عەدنان یاسری، ئەمینداری گشتی تەیاری نیشتمانی عێراقی بۆ گۆڕانکاری، کە بەشێکن لە ئامادەکارانی خۆپیشاندانەکانی عێراق، بۆ دەنگی ئەمریکا دەڵێت: “پێشتر خۆپیشاندەران لە گەنجانی بێ کار و دەرچووی دانەمەزراو پێکهاتبوون، فەرمانبەران کار و موچەیان هەبوو، بەشدار نەبوون، بەڵام ئەمجارە فەرمانبەرانیش بەشداری خۆپیشاندانەکان دەکەن، بۆیە شەقامی عێراقی لە چاوەڕوانی تەقینەوەیەکی گەورەدایە.”

ئەمینداری گشتی تەیاری نیشتمانی عێراقی بۆ گۆڕانکاری، جەختیکردەوە خۆپیشاندان لە عێراق دەستپێدەکاتەوە، چونکە هیچ هەنگاوێکی گەورە نەنراوە جێی ڕەزامەندی خۆپیشاندەران بێت، وەکئەو دەڵێت: “بکوژانی خۆپیشاندەران دەستگیرنەکراون، حکومەتی نوێ هیچ هەنگاوێکی بۆ چاکسازی نەناوە، بۆیە خۆپیشاندان بەشێوەی جیاوازتر دەست پێدەکاتەوە، پێشتر خۆپیشاندانەکان ناڕێکخراو بوون، سەرکردەیان نەبوو، بەڵام ئەمجارە خۆپیشاندانەکان ڕێکخراو دەبن و سەرکردایەتیشیان دەبێت، ئامانج و داواکاریەکانیشیان ڕوون دەبێت.”

دەربارەی ئەو بەڵێنانەی مستەفا کازمی سەرۆک وەزیرانی نوێی عێراق بەخۆپیشاندەرانی داوە، عەدنان یاسری ئاماژەی بەوەکرد سەرۆک وەزیرەکانی پێشووتریش بەڵێنیاندا، بەڵام هیچیان پێنەکرا، وتی: “حکومەت بەدەست سەرۆکوەزیران نییە، ئەو دەسەڵاتێکی ڕەمزیە، حکومەت بەدەست ڕاوێژکار و بەرپرس نوسینگەکانەوەیە، کەسەر بە حیزبە دەسەڵاتدارەکانن.”