تا ئێستا نزیکەی لە%70ی شەهیدانی هەڵەبجە لە ناو گۆڕە بەكۆمەڵەكاندان

عەلی حەمەسەعید-SNN

بەهۆی كیمیابارانی هەڵەبجەوە لە ساڵی 1988 زیاد لە پێنج هەزار هاووڵاتی شەهیدبوون و بە هەزارانی دیكەش برینداربوون، بەڵام تا ئێستا و لە دوای 36 ساڵ نزیکەی لە %70 ئەو شەهیدانە لە ناو گۆڕە بە كۆمەڵەكاندا بەخاك سپێردراون، سەرۆکی کۆمەڵەی قوربانیانی کیمیابارانی هەڵەبجە هۆكاری دەرنەهێنانەوەی ڕوفاتی ئەو شەهیدانە ئاشكرا دەكات.

لوقمان عەبدولقادر، سەرۆكی كۆمەڵەی قوربانیانی كیمیابارانی هەڵەبجە بە SNNی ڕاگەیاند: لە سنووری پارێزگای هەڵەبجە 53 گۆڕی بە كۆمەڵ بونیان هەیە كە شەهیدانی كیمیابارانی هەڵەبجەیان تیادا بەخاکسپێردراون، بە جۆرێک گۆڕی وا هەیە بە تەنها ڕوفاتی هەزار و 500 شەهیدی كیمیابارانی هەڵەبجەی لە خۆگرتووە، كە لە شێوەی چاڵێکی گەورەدان و بەهۆی بۆمبە ناپاڵمەكان ئەو چاڵە گەورانە دروست بوون.

ئاماژەی بەوەشكرد، وەك كۆمەڵەی قوربانیان بە هەماهەنگی لەگەڵ چەند لایەنێكی دیكەی پەیوەندیدار توانیومان شورایەك بۆ ئەو گۆڕە بە كۆمەڵانە بكەین بۆ ئەوەی تێكەڵ بە گۆڕستانی دیكە نەبن و ببنە سیمبولێك بۆ تاوانی كیمیابارانی هەڵەبجە، كە بە گوێرەی ئامارەكانمان لە %68 قوربانیەكان تەمەنیان لە خوار 18 ساڵیدایە و نزیكەی لە %70 كۆی گشتی شەهیدانی هەڵەبجە تا ئێستاش لە ناو گۆڕە بەكۆمەڵەكاندان.

سەرۆكی كۆمەڵەی قوربانیان ئەوەی خستەڕوو، گۆڕی شەهیدانی هەڵەبجە جیاوازە لە گۆڕی شەهیدەكانی دیكە، چونكە لە چەند ساڵی پێشوودا حەوت گۆڕی بەكۆمەڵمان لە سنووری پارێزگای هەڵەبجە هەڵدایەوە دەركەوت كە هێشتا كاریگەری چەكی كیمیایی لەسەر ڕوفاتەكان ماوە و ئەو تیمانەی كە كاریان دەكرد ڕووبەڕووی گرفت بوونەوە مەترسی لەسەر ژیانیان دروستبوو، لەگەڵ ئەوەشدا كەسوكاری ئەو شەهیدانە بۆخۆشیان ڕازینین بە هەڵدانەوەی گۆڕە بەكۆمەڵەكان بەڵام دواجار بڕیار لە دەستی حكومەت بۆ هەڵدانەوەیان و دەستكەوتنی ئامارێكی ورد و دروست لەسەر قوربانییەكان.