داواکاری گشتی سلێمانی: هۆشیارانە مامەڵە لەگەڵ دۆخەکەدا بکەن

SNN

فەرمانگەی داواکاری گشتی سلێمانی داوا لە هاووڵاتیان و دەزگاکانی راگەیاندن دەکات هۆشیاریان لەبارەی مەترسییەکانی کۆرۆناوە هەبێت و رۆڵی ئەرێنی ببینن، بە پێچەوانەوە رێکاری یاسایی دەگرنەبەر.

فەرمانگەی داواکاری گشتی سلێمانی لە راگەیەندراوێکیدا ئاماژەی بەوەکردووە: “بەهۆی ئاسایی بوونەوەی ژیانی رۆژانە و بەریەکەوتن و تێکەڵاوبوونی زۆری هاووڵاتیان لەگەڵ یەکتری رێژەی گیانلەدەستدان بە کۆرۆنا لە هەڵکشاندایە”.

هاوکات داوا لە هاووڵاتیان دەکات کە زیاتر پابەندی رێنماییەکان بن ئەویش لەپێناو پاراستنی گیانی خۆیان و خێزانەکانیان.

هاوکات داوا لە زانایانی ئایینی و رۆشنبیران و دەزگاکانی راگەیاندن دەکات کە رۆڵی ئەرێنی لە هۆشیارکردنەوەی هاووڵاتیان ببینن هەروەک پێشتر بینیویانە.

ئەوەش خراوەتەڕوو: “پێویستە دەزگاکانی راگەیاندن و بەکارهێنەرانی تۆڕە کۆمەڵایەتییەکان بەرپرسانە هەڵسوکەوت بکەن و لە مەترسی کۆرۆنا کەم نەکەنەوە و نەبنە هۆکاری لاوازی بڕوا و متمانەی هاووڵاتیان بە پێچەوانەوە ناچاردەبین رێکاری یاسایی دژ بە سەرپێچیکاران بگرینەبەر”.

ئەمە لەکاتێکدایە ژمارەی تووشبووان و گیانلەدەستدان بە کۆرۆنا لە چەند رۆژی رابردوودا لە هەرێم زیادیانکرد بەوهۆیەوە قەدەغەی هاتووچۆ بۆ شەش رۆژ راگەیەندرا.