مانگی رابردوو عێراق بایی 2 ملیار دۆلار نەوتی فرۆشتووە

SNN-

وەزارەتی نەوتی عێراق رایدەگەیەنێت “مانگی ئایاری رابردوو بەبڕی زیاتر لە 2 ملیار دۆلار، زیاد لە 99 ملیۆن بەرمیل نەوتی فرۆشتووە”.

کۆمپانیای سۆمۆی بریکاری رەسمیی فرۆشتنی نەوت ئامارەکانی فرۆشی نەوتی عێراقی راگەیاندووە کە “99 ملیۆن و 585 هەزار و 283 بەرمیل نەوتی هەناردە کردووە و 2 ملیار و 91 ملیۆن و 811 هەزار دۆلار داهات هەبووە”.

عاسم جیهاد وتەبێژی وەزارەتی نەوت دەڵێت: “بڕی 96 ملیۆن و 39 هەزار و 852 بەرمیل نەوت لە کێڵگەکانی باشوورەوە هەناردە کراوە و بڕی 3 ملیۆن و 545 هەزار و 431 بەرمیلیش لە کێڵگەکانی کەرکوکەوە فرۆشراوە”.

ئەوەشی ئاشکرا کردووە “رێژەی رۆژانەی نرخی یەک بەرمیل نەوت بەنزیکەیی 21.005 دۆلار فرۆشراوە و لەڕۆژێکدا 3 ملیۆن و 212 هەزار بەرمیل نێردراوە بۆ بازاڕەکانی دەرەوە”.