خەزعەلی “پێویستە تەواوی ھێزەکانی تورکیا لە ھەرێمی کوردستان بکشێنەوە”
قەیس خەزعەلی
SNN
ئەمینداری گشتی عەسائیبی ئەھلی حەق لەگەڵ نوێنەری وەزارەتی دەرەوەی تورکیا کۆبووەوە و جەختیکردەوە، لە پێویستی کشانەوەی تەواوی ھێزەکانی تورکیا لە ھەرێمی کوردستان.
نوسینگەی راگەیاندنی عەسائیبی ئەھلی حەق رایگەیاند، قەیس خەزعەلی لە بەغداد پێشوازیکرد لە رەزا کونای نوێنەری وەزارەتی دەرەوەی تورکیا و بورا یونان باڵیۆزی نوێی تورکیا لە عێراق.
لە کۆبوونەوەکەدا، ئاماژەکرا بە گرنگی دۆزینەوەی رێوشوێنی گشتگیر بۆ پەرەپێدانی متمانەی نێوان ھەردوو وڵات و خەزعەلی جەختیلەوەکردەوە، پێویستە تەواوی ھێزەکانی سوپای تورکیا لە ھەرێمی کوردستان بکشێنەوە و ھێزە عیراقییەکان لە شوێنیان جێگیربکرێن بۆ پاراستنی سەروەری و ئاسایشی عیراق.
ھەروەھا، خەزعەلی دوایین رێککەوتنی ئەمنی نێوان عیراق و تورکیای رەتکردەوە و وتی، ئەو رێککەوتنە نەیتوانیوە کێشە ھەڵپەسێردراوەکانی ھەردوو وڵات چارەسەربکات، بۆیە پێویستە نەخشە رێگەیەکی گشتگیر ئامادەبکرێت بۆ کشانەوەی سوپای تورکیا لە ھەرێم.
