داھاتی نانەوتی ئەم ھەفتەیەی سنوری سلێمانی بەڕێژەی زیاتر 26% دابەزیوە

SNN

داھاتی نانەوتی ئەم ھەفتەیەی هەردوو پارزێگای سلێمانی و ھەڵەبجە لەگەڵ ئیدارەکانی گەرمیان و راپەڕین زیاتر لە ھەشت ملیار دینارە و بەراورد بە ھەفتەی رابردوو بەڕێژەی زیاتر لە 26% دابەزیوە.

ئەمڕۆ هەینی 20ی ئەیلوول، ماڵپەری شەفافیەت کە چاودێری داھاتی نانەوتی سلێمانی و ھەڵەبجە و ئیدارەی ڕاپەڕین و گەرمیان دەکات داهاتی ئەم هەفتەیەی بڵاوکردەوە و رایگەیاندووە، داھاتی 14ی مانگ تا 20ی ئەیلول ھەشت ملیار و 440 ملیۆن و 871 ھەزار و 102 دیناری عێراقی بووە.

هاوکات، ئەم داهاتە بەراورد بە ھەفتەی رابردوو  بڕی سێ ملیار دینار واتە بەڕێژەی 26.5% دابەزیوە، لە داهاتی ئەم هەفتەیەش 77%ی نەختینە و 23%ی چەک بووە.

بەگوێرەی زانیارییەکانی ماڵپەری شەفافیەت، داھاتی ھەفتەی پێشووی سلێمانی و ھەڵەبجە و ئیدارەی راپەڕین و گەرمیان زیاتر لە 11 ملیار دینار بووە، ئەمە لە کاتێکدایە بۆ ئەم هەفتەیە زیاتر لە هەشت ملیار دینار بووە.