فراكسیۆنی یەكێتی لە بەغدا لە هەوڵی هێنانی نەوتی سپی ماڵانن لەعێراقەوە بۆ هەرێم
دابەشکردنی نەوتی سپی | فۆتۆ: SNN
SNN-عەلی حەمە سەعید
ئەندامێكی ئەنجومەنی نوێنەران لە فراكسیۆنی یەكێتیی نیشتمانی كوردستان ئاشكرایدەكات كە لەگەڵ نزیك بوونەوە هاتنی وەرزی سەرما و بارانبارین داوامان لە وەزارەتی نەوتی عێراق كردووە نەوتی سپی بۆ هاوڵاتییانی هەرێم دابین بكات، جەختیش دەكاتەوە كە وەزارەتی نەوتی عێراق لاری نەبوونی خۆی بۆ ئەو داواكارییەی فراكسیۆنی یەكێتی دەربریوە.
غەریب ئەحمەد، ئەندامی ئەنجومەنی نوێنەرانی عێراق لە فراكسیۆنی یەكێتیی نیشتمانی كوردستان بەSNNی ڕاگەیاند: هاوشێوەی ماوەكانی ڕابردوو كە بەردەوام هەوڵمان داوە بۆ ئەوەی دانیشتووانی هەریمی كوردستانیش هاوشێوەی هاوولاتیانی دیكەی عێراق بیبەش نەبن لە دابینكردنی پێداویستی و خزمەتگەزارییەكان، لەو چوارچێوەیەدا قسەمان لەگەڵ بەرپرسانی وەزارەتی نەوتی عێراق كردووە بۆ ئەوەی نەوتی سپی ماڵان بۆ هاووڵاتیانی هەرێم دابینبكەن.
ئاماژەی بەوەشكرد، لەچوارچێوەی هەوڵەكانی فراكسیۆنەكەمان بۆ دەستەبەركردنی ماف و شایستەكانی هاوڵاتییانی هەرێم لە بەغدا، بە نووسراوێكی فەرمی داوامان لە وەزیری نەوتی عێراقی كردووە كە پێش هاتنی وەرزی سەرما بەشە نەوتی سپی هاووڵاتییانی هەرێم دابینبكرێت و ڕەوانەی پارێزگاكانی هەرێم بكرێت بە نرخی پاڵپشتیكراو.
ئەو ئەندامەی ئەنجومەنی نوێنەرانی عێراق لە فراكسیۆنی یەكێتی ئەوەشی خستەڕوو، لە وەڵامی ئەو داواكارییەی فراكسیۆنەكەماندا وەزارەتی نەوتی عێراق وەڵامێكی ئەرێنییان داوینەتەوە بۆیە چاوەڕێین پێش هاتنی وەرزی زستان ئەو بڕە نەوتە بۆ هەرێمی كوردستان بنێرن.
