بێ ئاگاداری ئەمریکا ئیسڕائیل ناتوانێت لە عێراق بدات

SNN

ئەحمەد تمێمی، شارەزای بواری تەکتیکی سەربازی، بە میدیای عێراقییەکانی راگەیاند، کە وڵاتی ئیسڕائیل ناتوانێت هیچ کاردانەوە و هێرشک بکاتە سەر خاکی عێراق بەبێ گڵۆپی سەوزی ئەمریکا کە دەبێت بۆی هەڵبکات.

تمێمی، باس لەو گەلە راپۆرتەی میدیا ئیسڕائیلییەکان دەکات کە باس لە هێرشی وڵاتەکەیان دەکات، بۆ سەر گروپە چەکدارە ئیسلامییەکانی عێراق کە بە بەری مقاوەمە ناسراو، بەڵام بێ ئاگا لەوەی هەر هێرشێكی ئیسڕائیل بۆ سەر خاکی عێراق دەبێتە لێدان لە بەرژەوەندییەکانی ئەمریکا لە وڵاتەکەدا، بۆیە دەبێت ئیسڕائیل پێش وەختە و پێش هێرشەکە لەگەڵ ئەمریکا هاوئاهەنگبێت.

وتیشی، “ئەمریکا بە روونی ئەو ئەگەرانەی لێکداوەتەوە کاتێک دۆخی عێراق هاوشێوەی لوبنان و فەلەستین تێکبچێت، یەک پارچە دۆخی رۆژهەڵاتی ناوەراست تێکدەچێت و ئەوکات مەترسییەکە دەبێتە جیهانی و پریشی ئاگرەکە جیهان دەگرێتەوە”.