ساڵی رابردوو 59 کۆڵبەری کورد لە کاتی کۆڵبەریدا گیانیان لەدەستداوە

SNN

ساڵی 2024، 59 کۆڵبەر لە ڕۆژهەڵاتی کوردستان گیانیان لەدەستداوە و زۆربەیشیان بە هۆی تەقەی هێزەکانی ئێرانەوە بووە و 287 کۆڵبەری دیکەیش بریندار بوون.

بەپێی داتاکانی کۆڵبەر نیوز، ساڵی رابردوو سەدان کۆڵبەری کورد لە لایەن هێزە ئەمنییەکانی ئێرانەوە تەقەیان لێ کراوە و بە ئامانج گیراون، لە ئاکامی تەقەی هێزە ئەمنییەکان و ڕووداوەکانی دیکە 59 کۆڵبەر گیانیان لەدەست داوە و 287 کۆڵبەریش بریندار بوون.

ئەوەی جێگای سەرنجە لە 2024 بە بەراورد لەگەڵ 2023، گیانلەدەستدان و برینداربوونی کۆڵبەران بە ڕێژەی لە سەدا 15 زیادی کردووە.

259 کۆڵبەر بە هۆی تەقەی ڕاستەوخۆی هێزەکانی ئێرانەوە کوژراون یان بریندار بوون و کۆڵبەرەکانی دیکەیش بە هۆی رەقبوونەوە لە سەرمان، کەوتنە خوارەوە و هەڵدێران و پێداتەقینەوەی مین گیانیان لەدەستداوە یاخود بریندار بوون.

لە ڕاپۆرتەکەدا سەرنج خراوەتە سەر ئەوەی کە تەمەنی 22 کۆڵبەر لە خوار 18 ساڵەوە بووە و یەکێک لەوانیش بە هۆی سەرماوسۆڵەوە رەق بووەتەوە و گیانی لەدەستداوە.

سەرنج خراوەتە سەر ئەوەی ئەو کەسانە لە ناوچەکانی سەر سنوور لە هەریەک لە پارێزگاکانی ورمێ (ئورمییە)، سنە و کرماشان کاری کۆڵبەرییان کردووە.