كاروان یاروەیس: هەرێم پابەندی بڕیارەكانی دادگا نەبێت لەم ساڵیش گرفتی مووچە بەردەوام دەبێت
SNN-عەلی حەمە سەعید
بڕیاردەری فراكسیۆنی یەكێتی ئاماژە بەوەدەكات، بەبێ تەوتین و ڕادەستنەكردنی داهاتی نانەوتی بە بەغداد، كێشەی مووچەی فەرمانبەرانی هەرێمی كوردستان لە ساڵی 2025 قووڵتر دەبێتەوە.
كاروان یاروەیس بڕیاردەری فراكسیۆنی یەكێتی لە ئەنجومەنی نوێنەران بە SNN ڕاگەیاند: وەك فراكسیۆنی یەكێتی سوورین لەسەر جێبەجێكردنی بڕیاری دادگای فیدراڵی لەبارەی تەوتین و بۆ ئەو مەبەستەش واژۆی 150 پەرلەمانتارانی عێراق و سەرۆكی فراكسیۆنە كوردستانییەكانمان رادەستی محەمەد شیاع سودانی سەرۆك وەزیران كردووە.
ئاماژەی بەوەشكردووە، چارەسەرنەكردنی كێشەی ڕادەستنەكردنی داهاتی نانەوتی و جێبەجێنەكردنی تەوتین، وا دەكەن كێشەی مووچە لەمە قووڵتر بێتەوە.
بڕیاردەری فراكسیۆنی یەكێتی لە پەرلەمانی عێراق ئەوەشی خستەروو، ئەگەر تەوتینی مووچەی مووچەخۆرانی هەرێم نەكرێت، ئەوا كێشەی دواكەوتنی مووچە لەمساڵیشدا بەردەوام دەبێت و چارەسەر نابێت.
