پزیشکیان گەیشتە مۆسکۆ و لەگەڵ پوتن کۆدەبێتەوە

SNN-

سەرۆككۆماری ئێران، گەیشتە روسیا و بڕیارە پەیماننامەی هاوبەشی ستراتیژیی لەنێوان وڵاتەکەی و مۆسکۆ واژۆ بکات.

ئاژانسی تاسی روسی بڵاویكردەوە سەردانی مەسعود پزیشکیان بۆ مۆسکۆ بە مەبەستی گفتوگۆکردنە لەگەڵ ڤلادیمیر پوتن سەرۆكی روسیا و بەرپرسانی باڵای ئەو وڵاتە واژۆکردنی پەیماننامەی ستراتیژی هاوبەشی نێوانیان.

ئاژانسەکە راشیگەیاندووە کە رێككەوتنەكە بۆ ماوەی 20 ساڵە و زیاتر لە 30 بوار لە خۆدەگرێت، لەوانە ئابووری، گواستنەوە و ترانزێت و بانكی و وەبەرهێنان و زانست و تەكنەلۆژیا و نەوت و غاز و چەند بابەتێكی تر، ئەو پەیماننامە درێژخایەنە و لەسەر بنەماكانی پەیماننامەی نەتەوە یەكگرتووەكان ئەنجامدەدرێت بە لەبەرچاوگرتنی ماف و سەروەری هەردوولا.