کازمی: دەمانەوێت پەیوەندییەكانمان لەگەڵ وڵاتانی دراوسێ باشتر بكەین
مستەفا کازمی
سەرۆک وەزیرانی عێراق لە کۆبوونەوەیەکیدا لەگەڵ وەزیری وزەی ئێران لە بەغدا رایگەیاند: “دەمانەوێت پەیوەندییەکانمان لەگەڵ وڵاتانی دراوسێ باشتر بکەین”.
نوسینگەی سەرۆک وەزیرانی عێراق لە راگەیەندراوێکیدا ناوەڕۆکی کۆبوونەوەی ئەمڕۆی نێوان کازمی و رەزا ئەردكانیان وەزیری وزەی ئێرانی بڵاوکردەوە و ئاماژەی بەوەکرد: لە كۆبوونەوەكەدا، هاوكارییەكانی نێوان عێراق و ئێران بە تایبەتیش لە بواری كارەبا تاوتوێ كراوە، هەروەها جەخت لەسەر پتەوتركردنی پەیوەندییەكانی نێوان هەردوو وڵات كراوەتەوە.
مستەفا كازمی بە پێویستی زانیوە كە هەوڵەكان زیاتر چڕ بكرێنەوە بە ئامانجی چارەسەركردنی ئەو رەوشە گرژ و ئاڵوزەی كە وڵاتانی ناوچەكە رووبەڕووی بوونەتەوە و راشیگەیاندووە كە دەیانەوێت پەیوەندییەكانیان لەگەڵ وڵاتانی دراوسێ باشتر بكەن و حكوومەتیش لەچوارچێوەی كارنامەكەیدا هەوڵەكانی بۆ فراوانكردنی هاوكارییەكان لەگەڵ وڵاتانی دیكە خستووەتەگەڕ.
لای خۆیەوە وەزیری وزەی ئێران، رەزا ئەردكانیان رایگەیاندووە كە وڵاتەكەی پەرۆشی ئەوەیە هەماهەنگییەکانی لەگەڵ عێراق لەسەرجەم بوارەكاندا، پتەوتر بكات.
بەیانی ئەمڕۆ چوارشەممە وەزیری وزەی ئێران، رەزا ئەردكانیان بە یاوەڕی شاندێك گەیشتە، بەغدا و لەمیانیدا لەگەڵ سەركۆماری عێراق، بەرهەم ئەحمەد ساڵح كۆبوویەوە.
