“فراكسیۆنی یەكێتی لە هەوڵی هاوتاكردنی مووچەی زیندانیانی سیاسی هەرێمە لەگەڵ عێراق”

SNN-عەلی حەمە سەعید

پەرلەمانتارێكی فراكسیۆنی لە پەرلەمانی عێراق ئاماژە بەوەدەكات هەوڵەكانمان چڕكردووەتەوە بۆ ئەوەی دۆسیەی 25 هەزار زیندانی سیاسی هەرێم بخرێنە سەر دەستەی زیندانیانی عێراق بۆ ئەوەی ئەو ماف و ئیمتیازاتانەی زیندانیانی سیاسی عێراق هەیانە هەرێمیش بگرێتەوە.

چرۆ حەمە شەریف، ئەندامی لیژنەی شەهیدان و ئەنفالكراوان لە ئەنجومەنی نوێنەرانی عێراق بە SNNی ڕاگەیاند: هەوڵەكانی فراكسیۆنی یەكێتی بۆ بەرژەوەندی هاووڵاتیانی هەرێم بەردەوامەو بۆ ئەو مەبەستەش هەوڵەكانمان چڕكردووەتەوە بۆ ئەوەی مووچەی 25 هەزار زیندانی سیاسی لەهەرێمی كوردستان بگوازرێتەوە سەر دەستەی زیندانیانی سیاسی عێراق.

ئاماژەی بەوەشكرد، بانگهێشتی سەرۆكی دەستەی زیندانیانی سیاسی عیراقمان كردووە بۆ دانیشتنی لیژنەی شەهیدان و ئەنفالكراوان، ئەوەم پێوت كە وەك چۆن زیندانیانی سیاسی لەعێراق ئازارو ئەشكەنجە دراون، بەهەمان شێوە زیندانیانی سیاسی لە هەرێمیش بەهەمانشێوە بووە ئەشكنجە دراون، بۆیە دەبێت هەمان ماف و ئیمتیازاتیان هەبێت و قەرەبوو بكرێنەوە وەك چۆن بۆ زیندانیانی سیاسی عێراق كراوە.

ئەو پەرلەمانتارەی فراكسیۆنی یەكێتی ئەوەشی خستەڕوو، زیندانیانی سیاسی هەرێم ژمارەیان 25 هەزار زیندانی سیاسییەو رێكارە یاسایی و ئیدارییەكانیان تەواو بووە، هاوكات زیاتر لە 17 هەزار زیندانی سیاسی دیكەش هەن كە تائێستا رێكارە یاسایی و ئیدارییەكانیان تەواو نەبووە، بە گواستنەوەی دۆسیەكانیان لە هەرێمەوە بۆ عێراق ئەوا مووچەكانیان دەبێتە ملیۆنێك و 200 هەزار دیناری مانگانە.