زریانێکی بەهێز ئەمریکای گرتووەتەوە و بەهۆیەوە 17 کەس گیانیانلەدەستداوە

SNN

زریانێکی بەهێز ناوەڕاست و رۆژهەڵاتی ئەمریکای گرتووەتەوە، بەهۆیەوە لانیکەم نزیکەی 17کەس گیانیانلەدەستداوە و زیانی بە چەندین باڵەخانە و سروشتی ناوچەکە گەیاندووە.

بەگوێرەی میدیاکانی ئەمریکا، لە چەند ڕۆژی ڕابردودا زنجیرەیەک زریان چه‌ند ناوچەیه‌كی ئەمریکای گرتووەتەوە کە لە ئارکانساسەوە تا ئۆهایۆ درێژدەبنەوە و زیانیان بە باڵەخانەکان گەیاندوە و ڕێگاکان لافاویان گرتوە و دەیان گەردەلولیشیان لێکەوتوەتەوە.

بەرپرسانی ئەمریکا رایدەگەیەنن، به‌هۆی ئەو زریانەوە لانیکەم 17 کەس گیانیانلەدەستداوە، هاوکات دەزگای کەشوهەوای نیشتمانی هۆشداری داوە لە ڕودانی لافاوێکی زیاتر لە چەند ڕۆژی داهاتودا.

هەریەکە لە ویلایەتی تێنسی زۆرترین زیانی بەرکەوتوە بەهۆی بارودۆخی سەختی کەشوهەوا، لە کاتێکدا دەسەڵاتدارانی ناوچەکە مردنی 10 کەسیان لە بەشی ڕۆژئاوای ویلایەتەکە ڕاگەیاندوه‌، لە ویلایەتی میزۆری و کێنتاکیی دوو کەس گیانیانلەدەستدا، هەریەک لە ویلایەتی ئارکانساس، ئیندیانا و میسیسیپی هەریەکەیان یەک حاڵه‌تی گیانله‌ده‌ستدان تیایاندا تۆماركراوه‌.

پەیامنێرانی ئاژانسی فرانس پرێس بڵاویانکردەوە، لە شاری جێفرسۆنتاونی ویلایەتی کێنتاکیی ئەمریکا، چەندین باڵەخانە بەهۆی گەردەلولێکەوە وێران بون.