وەزیری دارایی چەند بڕیارێکی دەرکرد

وەزیری دارایی حكومەتی هەرێمی كوردستان چەند بڕیارێك لە بەرژەوەندی بەڵێندەران دەردەكات و بڕیار دەدات بە خەرجكردنی زیاتر لە 45 ملیار دینار بۆ پارێزگاكانی سلێمانی و هەڵەبجە و هەردوو ئیدارەی سەربەخۆی گەرمیان و راپەڕین.

وەزارەتی دارایی لە راگەیەندراوێكدا بڵاویكردەوە، بەمەبەستی بەدواداچوون بۆ كێشە و گرفتەكانی سنووری پارێزگای سلێمانی و هەڵەبجە و ئیدارەی گەرمیان و ڕاپەڕین، لەچەند ڕۆژی ڕابردوودا ئاوات شێخ جەناب وەزیری دارایی و ئابووری، سەرپەرشتی چەند كۆبوونەوەیەكی كرد لەگەڵ بەرپرسانی ئیداری و یەكێتی بەڵێندەران و بانكەكانی سەر بە وەزارەت، دوای ئەو كۆبوونەوانە و ئاگاداربوون لە كێشە و گرفتەكان، وەزیری دارایی چەند بڕیارێكی لە بەرژەوەندی بەڵێندەران و ئەو كۆمپانیایانە دەركرد كە سەرقاڵی ئەنجامدانی پڕۆژەكانن.

وەزیری دارایی بڕیاریدا بە خەرجكردنی زیاتر لە 45 ملیار دینار بۆ دەرمان و پێداویستی تەندروستی سلێمانی و نەخۆشخانەی هیوا و شەقامی 100 مەتری سلێمانی و ڕێگای دووسایدی كەلار – دەربەندیخان و شایستەی كۆمپانیاكانی خۆڵ و خاشاك و پڕۆژە بەردەوامەكانی پارێزگای سلێمانی و هەڵەبجە و ئیدارەی گەرمیان و ڕاپەڕین.

هاوكات هەر لە چوارچێوەی بڕیارەكاندا وەزیری دارایی و ئابووری بڕیاریدا بەبەردەوام بوونی لیژنەی خەرجكردنی گەڕانەوەی ( التأمینات و خطاب الضمان ) ی بەڵێندەران لەسەرجەم بانكەكان ، بەمەبەستی گەڕانەوەی پابەندییەكان بە پێی ڕێژە و گوژمەی دیاریكراو.

١- چوار ملیار و 500 ملیۆن دینار بۆ خەرجی دەرمان بۆ بەڕێوبەرایەتی گشتی تەندروستی سلێمانی.

٢- چوار ملیار دینار بۆ خەرجی دەرمان بۆ نەخۆشخانەی هیوا.

٣- سێ ملیار و 500 ملیۆن دینار بۆ سەرجەم پڕۆژەكانی سلێمانی و دەوروبەری.

٤- سێ ملیار دینار بۆ سەرجەم پرۆژەكانی ئیدارەی گەرمیان.

٥- دوو ملیار دینار بۆ سەرجەم پڕۆژەكانی ئیدارەی ڕاپەڕین.

٦- دوو ملیار دینار بۆ سەرجەم پڕۆژەكانی پارێزگای هەڵەبجە.

٧- پێنج ملیار دینار بۆ پڕۆژەی ڕێگای دوو سایدی كەلار – دەربەندیخان.

٨- 20 ملیار دینار وەك شایستەی دارایی پڕۆژەی شەقامی ( ١٠٠ ) مەتری سلێمانی ( شاڕێی بابان ).

٩- یەك ملیار و 500 ملیۆن دینار پارەی خۆڵ و خاشاك.