عەلی حەمەسەعید-SNN
لەگەڵ ئەوەی ماوەی چەند ڕۆژێكە باس لە قەدەغەكردنی هاوردەكردنی ئۆتۆمبێلی چینی دەكرێت بۆ بازاڕەكانی هەرێم، بەڵام بەڕێوەبەریگشتی بازرگانی لە وەزارەتی بازرگانی و پیشەسازی حكومەتی هەرێم ئاماژە بەوەدەكات ئەو بڕیارە لەلایەن عێراقەوە دەركراوە و تا ئێستا بڕیارەكەمان بەدەست نەگەیشتووە.
نەوزاد شێخ كامیل، بەڕێوەبەری گشتی بازرگانی لەوەزارەتی بازرگانی و پیشەسازیی حكومەتی هەرێم بەSNNی ڕاگەیاند: بڕیاری قەدەغەكردنی هاوردەكردنی ئۆتۆمبێلی چینی لەلایەن وەزارەتی بازرگانی عێراق دەركراوە، بەڵام بڕیارەكە نەگەیشتوەتە هەرێمی كوردستان، بۆیە هاوردەكردنی ئۆتۆمبێلی چینی لەدەروازە سنورییەكانەوە ئاساییە و ڕانەگیراوە.
ئاماژەی بەوەشكرد، تا ئێستا بەفەرمی هیچ بڕیارێكمان بەدەست نەگەیشتووە بۆ ڕاگرتن و قەدەغەكردنی هاوردەكردنی ئۆتۆمبێلی چینی، بۆیە ئەوەی هەیە تەنها لە ڕاگەیەاندنەكانەوە باسی لێوەكراوە و ئێمەش كار لەگەڵ نوسراوی فەرمی دەكەین.
ئەو بەرپرسەی وەزارەتی بازرگانی و پیشەسازی حكومەتی هەرێم ئەوەشی خستەڕوو، ساڵانە ڕێنمایی نوێ دەردەكرێت بۆ هاوردەكردنی ئۆتۆمبێل، هەربەگوێرەی ئەو ڕێنماییانەش ڕێگە بەهاوردەكردنی ئۆتۆمبێلی مۆدێل كۆن نادرێت، هاوكات بۆ قەدەغەكردنی هاوردەكردنی هەر بەرهەمێك، پێویستە عێراق بەفەرمی نوسراو ئاراستەی هەرێم بكات، بۆ قەدەغەكردنی هاوردەكردنی ئۆتۆمبێلیش تائێستا هیچ نوسراوێكمان بەدەست نەگەیشت.
