ئێران: هەوڵەکان بۆ تێکدانی سەقامگیری ئاسایشمان دەگاتە وڵاتانی دیکە

SNN

جێگری سەرۆکی لیژنەی ئاسایشی نیشتمانی و سیاسەتی دەرەوەی ئەنجومەنی شورای ئێران ڕایگەیاند، تێکدانی سەقامگیری ئێران دەبێتە هۆی بۆ وڵاتانی دیکە و جەختی لەوە کردەوە کە وڵاتەکەی خاوەنی توانای بەرفراوانە بۆ ڕووبەڕووبوونەوەی هەر دوژمنێک.

عەباس موقتەدایی، جێگری سەرۆکی لیژنەی ئاسایشی نیشتمانی و سیاسەتی دەرەوەی ئەنجومەنی شورای ئێران لە ڕاگەیەندراوێکدا باسی لەوەکردوە، “ناسەقامگیرکردنی ئێران دەبێتە هۆی بڵاوبونەوەی ئەو بارودۆخانە بۆ وڵاتانی دیکە”.

ئاماژەی بەوەشکرد، کاتێک ئێران ئاسایشی هەبێت و چێژ لە ئاسایش وەربگرێت، ئەو ئاسایشە بۆ وڵاتانی دیکەی ناوچەکەش تەشەنە دەکات، “تاران پشت بە توانا ناوخۆیی و نیشتمانییەکانی دەبەستێت، خاوەنی ئامڕاز و نۆرمەکان و ئامێری سەربازی پێشکەوتوە و لە دۆخێکی ئامادەیی بەرگری تەواو و هەماهەنگدایە”.

ناوبراو جەختی لەوە کردەوە کە “کۆماری ئیسلامی خاوەنی توانایەکی بەرفراوان و سەرنجڕاکێشە لە بواری دەریایی، بۆشایی ئاسمان و ئاسمانیدا و دەتوانێت دەستکەوتی گەورە لە ڕوبەڕوبونەوەی هەر دوژمنێکدا بەدەستبهێنێت، ئێران پێویستی بە کەسانی دیکە نییە بۆ دەستەبەرکردنی سەربەخۆیی خۆی”.