تەندروستی راپەڕین لە بارەی دامەرزاندنی کۆمەڵێک کارمەندی تەندروستی روونکردنەوە دەدات

SNN-محەمەد مستەفا

دامەزراندنی کۆمەڵێک کارمەندی تەندروستی لە ئیدارەی راپەڕین ناڕەزایەتی دەرچوانی زانکۆ و پەیمانگاکانی لێدەکەوێتەوە و تەندروستی ڕاپەڕینیش روونکردنەوەیەک بڵاو دەکاتەوە.

تەها محەمەد بەرپرسی بەشی راگەیاندنی تەندروستی ڕاپەڕین بە SNN ی راگەیاند: بۆ بەرچاو روونی هاوڵاتیانی ئیدارەی ڕاپەڕین، دوای بڵاوبوونەوەی ڤایرۆسی کۆڕۆنا کۆمەڵێک کارمەندی تەندروستی بۆ سەنتەری نەخۆشیە گوازراوەکانی ڕانیە و قەڵادزێ بە گرێبەستێکی کاتی دامەزرێنراون کە ژمارەیان 15 کارمەندە .

وتیشی: “گرێبەستی دامەزراندنی ئەو 15 کارمەندە بۆ ماوەی دوو مانگە و رێکخراوێک بودجەکەیەکی بۆ تەرخانکردوون، هاوکات شێوازی گرێبەستەکەش لەلایەن لیژنەیەکی بەڕێوەبەرایەتی تەندروستی ڕاپەڕین سەرپەرشتیکراوە و شێوازی گرێبەستەکەش بەشێوەی فۆڕم و خاڵبەندی بووە “.

باسی لەوەشکرد: تەندروستی ڕاپەڕین رەتی دەکاتەوە شێوازی گرێبەستەکە دەستی هیچ کەس و لایەنێکی سیاسی تێدا بووبێت، لە گرێبەستەکەدا ماف دراوە بەو کارمەندانەی کە بەشێوەی خۆبەخش لە ناوەندە تەندروستیەکان خزمەتیان کردووە .

تەها محەمەد رونیشیکردەوە: “هەرکەسێک خۆی بەماف خوراو دەزانێت، بە مەرجێک فۆڕمی پڕکردبێتەوە و لە کاتی خۆیدا گەڕاندبێتیەوە دەست لیژنەی سەرپەرشتیار، ئەوا دەتوانێت داوا پێشکەشی لیژنەی سەرپەرشتیار بکات بۆ وردبینیکردن و لێکۆڵینەوە لە داواکەی”.