دارگوێزەكانی هەورامان توشی نەخۆشی شێرپەنجەی دارگوێز بوون

عەلی حەمە سەعید-SNN
بەهۆی بڵاوبونەوەی جۆرە نەخۆشیەكی بەكتری و كەڕوویی كە بە نەخۆشی شیرپەنجە ناسراوە، بە سەدان دارگوێز لە هەورامان توشی ئەو نەخۆشییە بوون و بەوهۆیشەوە دەیان دارگوێزەكان بەتەواوەتی وشک بوون

ڕەمەزان مەحمود، یەكێك لەخاوەن باخە دارگوێزەكانی تەویڵە بە SNNی ڕاگەیاند: ماوەی چەند ساڵێكە نەخوشییەكی بەكتری و كەڕووی كە بەنەخۆشی شێرپەنجەی دارگوێز ناودەبڕێت لەناو باخە دارگوێزەكانی هەورامان بڵاو بووەتەوە بەو هۆیشەوە بەسدان دارگوێز بە تەواوەتی وشك بوون و هیچ هیوایەك نەماوە بۆ دووبارە سەوزبوونەوەیان كە هەندێك لەو دارگوێزانە تەمەنیان نزیكەی 100 ساڵ دەبێت.

ئاماژەی بەوەشكرد، لەساڵانی ڕابردوو لایەنە پەیوەندیدارەكان دەرمانی قڕكەریان بۆ خاوەن باخەكان دابینكردووە بەڵام بەهۆی پابەند نەبوونی بەشێك لە خاوەن باخەكان بە بەكارهێنانی دەرمانەكە و هەروەها بەهۆی ئەوەی بەشێك لە خاوەن باخەكان ماڵیان لە سلێمانییەو باخەوانیان بۆ باخەكانیان گرتووە، زۆر گرنگییان بەو ڕێنماییانەی ئێمە نەداوە تا كارگەیشتوەتە ئەم دۆخەی كە مەترسی لەناوچوونی سەرجەم دارگوێزەكانی هەورامان لە ئارادایە.

ئەو خاوەن باخەدارگوێزەی تەویڵە ئەوەشی خستەڕوو، مەترسی ئەم نەخۆشییە لەوەدایە كە  لەڕێگەی ئاو وهەوا وبەركەوتن و دەست لێدان و حەشەرات دەگوازرێتەوە بۆ دارگوێزەكانی دیكە، بۆیە كۆنتڕۆڵكردنی زۆر ئەستەم بووە، بەتایبەت كە سیستمی ناوچەی هەورامان ئاودێرییە دووبارە لەڕێگای سپێرەوە دارگوێزەكان تووش دەبنەوە دارگوێزەكان بۆماوەی ساڵێك بەرگە دەگرێت بەڵام بۆساڵی داهاتوو بەتەواوەتی وشك دەبێت.