کەشناسێک داوا لە هاووڵاتیان دەکات نوێژەبارانە بکەن

SNN

مەترسییەکانی وشکەساڵی ترس و نیگەرانی لای هاووڵاتییان دروستکردووە و کەشناسێکیش دەڵێت “ئەم مانگە شەپۆلی باران درەنگ دەکەوێت و هەینی نوێژە بارانە بکەن”.

پشتیوان پێنجوینی شارەزای بواری کەشناسیی رایدەگەیەنێت، تا 15ی ئەم مانگە هیچ شەپۆلێکی بارانبارین بۆ ناوچەکانمان پێشبینی نەکراوە، ئەگەری شەپۆلی بارانبارین دوادەکەوێت.

داوا لە هاووڵاتییان و نوێژخوێنان دەکات و دەڵێت “داوا دەکەم سبەینێ هەینی ڕێکەوتی 7ی تشرینی دووەم، لە سەرجەم شار و شارۆچکە و گوندەکانی هەرێمی کوردستان، نوێژەبارانە ئانجامبدرێت”

ئەوەش هاوکاتە لەگەڵ داوایەکی وەقفی سوننی عێراقیی بۆ ئەنجامدانی نوێژەبارانە لە ڕۆژی شەممەدا، وەقفی سوننی عێراقیش لە راگەیەنراوێکدا داوای لە مسوڵمانان کرد لە رۆژی شەممەی داهاتوودا نوێژە بارانە بکەن.

ئەمەش دوای ئەوە دێت، نزیکەی 50 ڕۆژی وەزری پاییز تێپەڕیوە و تا ئێستا هیچ بارانێکی سەرتاسەریی هەرێمی کوردستان و عێراقی نەگرتوەتەوە و تادێت مەترسییەکانی کەمبارانیی و وشکەساڵیی زیاد دەکات، لە کاتێکدایە ساڵی رابردوو تا ئەم کاتە چەند جارێک شەپۆلی بارانبارین هەرێمی کوردستانی گرتبووەوە.