لایەنەکان وەڵامی بارزانی دەدەنەوە: هەڵبژاردن دیزاین نەکراوە

SNN

لێدوانێکی مەسعود بارزانی، سەرۆکی پارتی دیموکراتی کوردستان، سەبارەت بەوەی هەڵبژاردنی ئەنجوومەنی نوێنەران “دیزاینکراوە”، کاردانەوەی توندی لایەنەکانی دیکەی لێکەوتووەتەوە و بەشێکیان بە قسەی “بێ بنەما” و “ترس لە دۆڕان”ـی ناودەبەن.
قسەکەی بارزانی

مەسعود بارزانی لەکاتی بانگەشەی هەڵبژاردن لە هەولێر ڕایگەیاند، “لە هەڵبژاردنی ئەمجارەدا گۆڕانکاری بەسەر کورسییەکاندا نایەت، چونکە پێشوەختە کورسییەکان دەستنیشان کراون”.

یەکگرتوو: دیزاینکردن ئاسان نییە
مستەفا عەبدوڵا، ئەندامی مەکتەبی سیاسیی یەکگرتووی ئیسلامی، پێی وایە دیزاینکردنی هەڵبژاردن بەهۆی چاودێریی زۆرەوە ئاسان نییە و دەڵێت: “وا نابینین دیزاینکردن وا ئاسان بێت بۆ هەڵبژاردنی ئەمجارە، بۆیە ئێمە هیچ بڕیارێکی پێشوەختە نادەین”.

ڕەوتی هەڵوێست: هیچ کورسییەک دیاری نەکراوە
غالب محەمەد، سەرکردە لە ڕەوتی هەڵوێست، بە توندی قسەکانی ڕەتدەکاتەوە و دەڵێت: “پێموایە مەسعود بارزانی لێی تێکچووە… هیچ کورسییەک بۆ هیچ کەس و لایەنێک دیاری نەکراوە”. هەروەها دەپرسێت: “ئەگەر دیزاین کراوە، ئەم هەموو فشارە چییە لە خەڵک دەکرێت بۆ ئەوەی دەنگیان پێ بدەن؟”.

کۆمەڵ: مەگەر کاک مەسعود خۆی دیزاینەر بێت
ئەحمەد حاجی ڕەشید، بەربژێری دیاری کۆمەڵی دادگەریی کوردستان، بە گاڵتەجاڕییەوە وەڵام دەداتەوە و دەڵێت: “مەگەر کاک مەسعود خۆی دیزاینەری یەکەمی هەڵبژاردنەکە بێت… ئەو قسانە هیچ بنەمایەکیان نییە و ترسی لە دەستدانی بەشێک لە کورسییەکانیان هەیە”. ناوبراو پێی وایە ئەم قسانە تەنها بۆ ساردکردنەوەی خەڵکە لە دەنگدان.