وەزارەتی کارەبا لەبارەی بڕانی کارەبا روونکردنەوە دەدات
SNN-
وەزارەتی کارەبای هەرێمی کوردستان روونکردنەوەیەک لەبارەی پچڕانی کارەبای گەڕەکێکی شاری هەولێر بڵاودەکاتەوە و دەڵێت، تیمەکانیان خەریکی چارەسەرکردنی کێشەکەن و سوپاسی هاووڵاتییانیش دەکات.
وەزارەتی کارەبا رایگەیاند، لە 48 کاتژمێری رابردوودا بەهۆی کارەکانی چاکسازی و سازدانەوەی تۆڕی کارەبا، بەشێک لە دانیشتووانی گەڕەکی “فەرمانبەران”ـی شاری هەولێر تووشی پچڕانی کارەبا بوون.
وەزارەتەکە ئاماژەی بەوەکردووە، پێشتر هاووڵاتییانیان ئاگادارکردووەتەوە لە چوارچێوەی هەوڵەکان بۆ دابینکردنی کارەبا و کەمکردنەوەی پچڕانەکان، کاری چاکسازی لە گۆڕەڕەکان (موحەویلەکان) و تۆڕی کارەبای نیشتمانیدا دەکەن.
سەبارەت کاتی گەڕانەوەی کارەباش، وەزارەتی کارەبا دڵنیایی دەدات لە ئێستادا تیمەکانی وەزارەت و پڕۆژەی رووناکی کار لەسەر گەڕاندنەوەی کارەبا بۆ دانیشتووانی گەڕەکی فەرمانبەران دەکەن.
وەزارەتی کارەبا داوا لە هاووڵاتییانیش دەکات بەردەوام ئاگاداری نامەی مۆبایلەکانیان بن بۆ ئەوەی زانیارییان لەبارەی کارەکانی چاکسازی لە ناوچەکانیان هەبێت و بۆ هەر پرسیارێکیش دەتوانن پەیوەندی بە ژمارە 1992ـەوە بکەن.
