یەدەگی زێری عێراق گەیشتووەتە 172 تۆن

SNN

محەمەد شیاع سودانی سەرۆکوەزیرانی عێراق دڵنیایی لەبارەی دۆخی دارایی وڵات دا و جەختیکردەوە، یەدەگی دۆلار 108 ملیارە و زێڕیش گەیشتووەتە 172 تۆن.

محەمەد شیاع سودانی سەرۆکوەزیرانی عێراق لە چاوپێکەوتنێکی تەلەفزیۆنیدا رایگەیاند، بودجەی سێ ساڵە هاوکارییەکی باشی کردین لە بەدیهێنانی سەقامگیری و خەرجیی گشتی و گەرەنتیکردنی پارەدارکردنی پرۆژەکانی حکومەت، بەڵام پێناچێت بۆ داهاتوو پەنای بۆ بەرینەوە، بۆ بودجەی ساڵی 2026 حکومەت کۆمەڵێک خاڵی گرنگی داناوە کە لە داڕشتنەوەی بودجەدا پشتیان پێببەستێت.

ئاماژەی بەوەشکرد، یەدەگی دۆلار 108 ملیارە و زێڕیش گەیشتووەتە 172 تۆن، کۆی کۆی قەرزی دەرەکی 10 ملیارو 56 ملیۆن دۆلارە، هیچ وڵاتێکیش نییە لە جیهاندا قەرزی دەرەکی نەبێت.

سەبارەت بە ژمارەی مووچەخۆرانی عێراق سودانی ئاشکرایکرد، ژمارەی فەرمانبەران لە ساڵی 2025دا چوار ملیۆن و 550 هەزار و ژمارەی خانەنشینانی مەدەنی و سەربازی دوو ملیۆن و 960 هەزار کەسە، جگە لەوەش ساڵانە شەش ترلیۆن دینار بۆ چاودێریی کۆمەڵایەتی تەرخاندەكرێت.