مەسعود بارزانی: زیانگەیاندن بە خوشک و برایانمان لە ڕۆژئاوا قابیلی قبوڵ نییە

SNN-

مەسعود بارزانی، لە پەیامێکدا نیگەرانیی قووڵی خۆی لەبارەی دوایین پێشهات و ڕووداوەکانی سووریا و ڕۆژئاوا دەربڕی. سەرۆک بارزانی هۆشداری دەدات کە زیانگەیاندن بە خەڵکی ڕۆژئاوا قابیلی قبوڵ نییە و داوای ئاگربەستێکی سەرتاسەری و چارەسەری ئاشتییانە دەکات.

“زیانگەیاندن بە خەڵکی ڕۆژئاوا قابیلی قبوڵ نییە”

لە پەیامەکەیدا، مەسعود بارزانی ڕایگەیاند: “بە نیگەرانییەکی زۆرەوە و بەوردی بەدواداچوون بۆ دوایین پەرەسەندن و ڕووداوەکانی سووریا و ڕۆژئاوا دەکەین. لەو بارودۆخە هەستیارەدا پێویستە هەموو لایەک بەرپرسیارانە و دوور لە عاتیفە ڕەفتار بکات و وای لێ نەیەت زیان بە خوشک و برایانمان لە ڕۆژئاوا بگات، کە بە هیچ شێوەیەک قابیلی قبوڵ نابێت.”

هەروەها جەختی لەوەشکردەوە: “ئێمە هەموو هەوڵی خۆمان خستووەتەگەڕ و بەردەوامین کە خوشک و برایانمان لە ڕۆژئاوا تووشی کارەسات و نەهامەتی نەبن.”

مەترسیی سەرهەڵدانەوەی داعش

بارزانی هۆشداریی دا لە دەرەنجامە مەترسیدارەکانی ئەم بارودۆخە و وتی: “لەلایەکی ترەوە لەو بارودۆخە ئاڵۆزەی دروست بووە، مەترسیی سەرهەڵدانەوەی داعش و تیرۆریش لە ئارادایە کە خۆیەلەخۆیدا هەڕەشەیەکی زۆر جددییە لەسەر سەقامگیری و ئاساییشی ناوچەکە.”

بانگەوازێک بۆ کۆمەڵگەی نێودەوڵەتی

لە کۆتایی پەیامەکەیدا، مەسعود بارزانی داوایەکی ڕاستەوخۆی ئاراستەی کۆمەڵگەی نێودەوڵەتی و هاوپەیمانان کرد و ڕایگەیاند: “داوا لە کۆمەڵگەی نێودەوڵەتی و هاوپەیمانان دەکەین کە بە بەرپرسیارێتیی خۆیان هەڵبستن و دەستبەجێ گرژی و شەڕ و پێکدادانەکان ڕابگیرێن و ئاگربەسێکی سەرتاسەری ڕابگەینرێت و کێشەکان بە شێوازێکی ئاشتیانە و لەڕێگەی حیوارەوە چارەسەر بکرێ