ڕۆژنامەی مەدا: چوارچێوەی هەماهەنگی بیری لە بژاردەی بەردەوامبوونی حکومەتی سودانی کردووەتەوە
محهمهد شیاع سودانى، سهرۆكوهزیرانى عێراق | فۆتۆ: IFG
SNN-
ڕۆژنامەی مەدای عێراقی لە ژمارەی ئەمڕۆیدا پەردەی لەسەر کۆبوونەوەیەکی نهێنیی هێزەکانی ناو چوارچێوەی هەماهەنگی لادا، کە شەوی ڕابردوو و پێش کۆبوونەوەی هاوپەیمانیی بەڕێوەبردنی دەوڵەت ئەنجامدراوە. لەو کۆبوونەوەیەدا، سەرکردە شیعەکان بە وردی تاوتوێی بژاردەکانی خۆیان کردووە لەبارەی پرسی دیاریکردنی بەربژێری داهاتوو بۆ پۆستی سەرۆکوەزیرانی عێراق.
بژاردەکانی تێپەڕاندنی بنبەستی سیاسی
بەپێی زانیارییەکانی ڕۆژنامەکە، بژاردەکانی چوارچێوەی هەماهەنگی لە ئێستادا زۆر سنووردار بوونەتەوە. هێزە شیعەکان لەنێوان دوو ڕێگەدان؛ یەکەم پێشکەشکردنی بەربژێرێکی سازان وەک جێگرەوەی نوری مالیکی، دووەمیش پەنابردن بۆ بژاردەی بەردەوامبوونی حکومەتەکەی محەمەد شیاع سودانی وەک چارەسەرێکی کاتی. ئەم هەوڵانە بۆ دەربازبوونە لەو بنبەستەی کە بەهۆی پێداگریی دەوڵەتی یاسا لەسەر بەربژێرکردنی مالیکی دروستبووە.
دەرکەوتنی بەربژێری نوێ و توڕەیی مالیکی
سەرەڕای پێداگرییەکانی دەوڵەتی یاسا بۆ پۆستی سەرۆکوەزیران، ناوی چەند کەسایەتییەک وەک جێگرەوەی مالیکی هاتوونەتە ناو باسەکان، لەوانە حەمید شەتر، سەرۆکی دەزگای هەواڵگری. هاوکات باس لەوە دەکرێت کە سودانی پاڵپشتی لە ئیحسان عەوادی، بەڕێوەبەری نووسینگەکەی دەکات بۆ ئەو پۆستە. ئەم پێشنیازەی دووەمیان توڕەیی نوری مالیکی لێکەوتووەتەوە، بەتایبەت کە عەوادی پێشتر لە حیزبی دەعوە جیابووەتەوە.
پێشنیازی فراوانکردنی دەسەڵاتەکانی سودانی
ڕۆژنامەی مەدا ئاشکرای کردووە، کە بەهۆی ناڕەزایەتییەکانی ئەمریکا و پێداگریی مالیکی، چوارچێوەی هەماهەنگی کەوتووەتە ناو بنبەستێکی قووڵ، ئەمەش وایکردووە هاوپەیمانیی بەڕێوەبردنی دەوڵەت دوای 8 مانگ کۆببێتەوە. لە کۆبوونەوەکاندا پێشنیاز کراوە کە دەسەڵاتەکانی سوودانی لە ڕێگەی ئەنجوومەنی نوێنەرانەوە فراوان بکرێت. ئەم پێشنیازە لەلایەن بەشێک لە سەرکردە شیعەکانەوە پاڵپشتی دەکرێت، لە کاتێکدا قەیس خەزعەلی و عەممار حەکیم کە دژی گەڕانەوەی مالیکین، لە دواین کۆبوونەوەی چوارچێوەکەدا ئامادە نەبوون.
