بافڵ جەلال تاڵەبانی: پەیوەندییە بەهێزەکەی ساڵح موسلیم لەگەڵ یەکێتی، فاکتەری یەکدەنگیمان بوو

سەرۆکی یەکێتیی نیشتمانیی کوردستان لە پەیامێکدا سەرەخۆشی بۆ کۆچی دوایی ساڵح موسلیم، سەرکردەی دیاری رۆژئاوای کوردستان راگەیاند و ئاماژە بە رۆڵە گرنگەکەی دەکات لە پرسە نەتەوەییەکان و یەکخستنی دەنگی کورددا.

هاوخەمی بۆ خەڵکی رۆژئاوا و پەیەدە

بافڵ جەلال تاڵەبانی، سەرۆکی یەکێتیی نیشتمانیی کوردستان، لە پەیامەکەیدا نیگەرانیی قووڵی لە دڵەوە بۆ کۆچی دوایی ساڵح موسلیم، ئەندامی دەستەی سەرۆکایەتیی پارتی یەکێتیی دیموکراتی (پەیەدە) دەربڕی. هاوکات پرسە و سەرەخۆشیی خۆی ئاراستەی خەڵکی رۆژئاوای کوردستان، هەڤاڵانی پەیەدە و کەسوکاری کۆچکردوو کرد و خۆی بە هاوبەشی خەمیان زانی.

رۆڵێکی بەرچاو لە پرسە نیشتمانییەکاندا

لە بەشێکی دیکەی پەیامەکەیدا، بافڵ جەلال تاڵەبانی تیشک دەخاتە سەر پێگەی ئەو سەرکردەیە و ئاماژە بەوە دەکات، کە ساڵح موسلیم وەک یەکێک لە سەرکردە دیارەکانی رۆژئاوای کوردستان، رۆڵێکی زۆر بەرچاوی لە پرسە نەتەوەیی و نیشتمانییەکاندا هەبووە.

فاکتەری یەکدەنگیی کورد

سەرۆکی یەکێتی باسی لە پەیوەندییە بەهێزەکانی نێوان ئەو سەرکردەیە و حزبەکەی کردووە، کە وەک فاکتەرێکی بەهێزی یەکدەنگیی بۆ داکۆکیکردن لە مافەکانی گەلی کورد وەسفی دەکات. لە کۆتایی پەیامەکەشیدا هیوای خواستووە رۆحی هەڤاڵی کۆچکردوو شادبێت و خوای گەورە ئارامی و دڵنەوایی بە هەموو لایەک ببەخشێت.