نرخی زێر هاڕەیکرد، نزمترین ئاستی چوار مانگی ڕابردوو تۆمارکرد
SNN
ئەمڕۆ لە بازاڕە جیهانییەکانی کاڵا و پشکەکاندا، نرخی زێڕ پاشەکشەیەکی گەورە و بەرچاوی بەخۆیەوە بینی، بە جۆرێک کە نرخەکەی گەیشتە نزمترین ئاست کە لە ماوەی چوار مانگی ڕابردوودا تۆمار کرابێت.
بەپێی دوایین داتاکانی بازاڕی بۆرسەی جیهانی، نرخی زێڕ بە ڕێژەی ٤٪ـی بەهای خۆی لەدەستداوە. ئەم دابەزینە خێرایە وایکردووە لە ئێستادا یەک ئۆنسە زێڕ بە ٤ هەزار و ٢٨٥ دۆلاری ئەمریکی مامەڵەی پێوە بکرێت، ئەمەش وەک گەورەترین پاشەکشەی نرخ لە ماوەی ١٢٠ ڕۆژی ڕابردوودا هەژمار دەکرێت.
شارەزایانی بواری ئابووری هۆکاری ئەم لەرەلەرە توندەی نرخەکان بۆ چەند خاڵێک دەگەڕێننەوە، لەوانە ئاڵۆزییە سەربازی و سیاسییەکانی ئەم دواییەی ناوچەکانی ڕۆژهەڵاتی ناوەڕاستی گرتووەتەوە، کە کاریگەری ڕاستەوخۆیان لەسەر بازاڕی زێڕ دروست کردووە، هاوکات ترس لە ئەگەری سەرهەڵدانی شەپۆلێکی نوێی هەڵئاوسانی ئابووری وایکردووە وەبەرهێنەران و بازرگانان بە وریاییەکی زۆرەوە مامەڵە بکەن.
لەلایەکی ترەوە، دۆخی نادیاری سیاسی بووەتە هۆی ئەوەی بازاڕەکان جێگیر نەبن و نرخەکان بە شێوەیەکی خێرا بەرەو خوارەوە بشکێنەوە.
