ئاژانسی بلومبێرگ: یەکەم باری نەوتی عێراق بە گەرووی هورمزدا تێپەڕی

SNN-

دوای پەککەوتنی جووڵەی دەریاوانی بەهۆی جەنگی دژی ئێران، یەکەم باری نەوتی خاوی عێراق لە ڕێگەی گەرووی هورمزەوە گەیشتە وڵاتی هیندستان.

وردەکاریی کەشتییەکە و بارەکەی
ئاژانسی بلومبێرگ لە ڕێگەی سیستەمی شوێنپێهەڵگرتنی کەشتییەکانەوە ئاشکرای کرد، کەشتیی نەوتهەڵگری “ئۆمیگا تره‌یدەر” بە بارێکی 2 ملیۆن بەرمیل نەوتی خاوی عێراقەوە بە گەرووی هورمزدا تێپەڕیوە. ئەمە یەکەم کەشتیی نەوتهەڵگرە لە دوای سەرهەڵدانی قەیرانی دەریاوانی لەو ناوچەیە بەهۆی جەنگی دژی ئێران، تێپەڕبوونی تۆمار بکرێت.

کۆمپانیای بەڕێوەبەر و کاتی گەیشتن
کەشتییەکە لەلایەن کۆمپانیای “مێتسوی” ژاپۆنییەوە بەڕێوەدەبرێت. دوای ئەوەی بۆ ماوەی زیاتر لە 10 ڕۆژ ئاماژەی سیگناڵەکەی لە ناو کەنداوەوە بڕابوو، دواجار گەیشتووەتە مۆمبای لە وڵاتی هیندستان و پڕۆسەی گواستنەوەی بارەکەی بە سەرکەوتوویی کۆتایی هاتووە.

کاریگەریی ئاڵۆزییەکان لەسەر گەرووی هورمز
لە دوای هێرشە هاوبەشەکانی ئەمریکا و ئیسرائیل بۆ سەر ئێران، جووڵەی کەشتییە بازرگانی و نەوتهەڵگرەکان لە گەرووی هورمز ڕووبەڕووی ئاستەنگی گەورە بووەوە. ئەم گەرووە وەک گرنگترین ڕێڕەوی ئاویی جیهان دەبینرێت کە بەشێکی زۆری پێداویستیی وزەی جیهانی لێوە تێدەپەڕێت و پەککەوتنی کاریگەریی ڕاستەوخۆی لەسەر بازاڕەکان دروست کردووە.