پڕۆژەی ڕووناکی؛ نیوەی هاووڵاتیانی کوردستان کەمتر لە 36 هەزار دینار پارەی کارەبا دەدەن

SNN

وەزارەتی کارەبای حکومەتی هەرێمی کوردستان، پسوولەی مانگی دووی هاوبەشانی ماڵانی لە چوارچێوەی “پڕۆژەی ڕووناکی” دابەش کرد. بەپێی داتا فەرمییەکان، 80%ـی هاووڵاتیان، بەتایبەت کەمدەرامەتان، پارەیەکی زۆر کەمتریان بۆ گەڕاوەتەوە بەراورد بەو پارەیەی پێشتر بۆ کارەبای نیشتمانی و مۆلیدە دەیاندا.

نرخی کارەبا لە شارەکان چەند بووە؟

بەپێی ئامارەکانی وەزارەتی کارەبا، نیوەی هاووڵاتیانی هەرێمی کوردستان لە مانگی دوودا، بڕی پسوولەکانیان کەمتر بووە لە 36 هەزار دینار. نرخەکان لە شارەکان بەم شێوەیە بووە:

هەولێر: نیوەی هاووڵاتیان کەمتر لە 30,000 دینار.

سلێمانی: نیوەی هاووڵاتیان کەمتر لە 35,000 دینار.

دهۆک: نیوەی هاووڵاتیان کەمتر لە 74,000 دینار.

هەڵەبجە: نیوەی هاووڵاتیان کەمتر لە 39,000 دینار.

ملیۆنان هاوبەش سوودمەند بوون

پڕۆژەی ڕووناکی ئێستا گەیشتووەتە زۆرترین ژمارەی هاووڵاتیان. لە سەرتاسەری کوردستان چوار ملیۆن و 427 هەزار هاووڵاتی و 137 هەزار شوێنی بازرگانی لەم پڕۆژەیە سوودمەند بوون. زۆرترین هاوبەش لە هەولێرن کە ملیۆنێک و 935 هەزار کەسن، پاشان سلێمانی بە ملیۆنێک و 345 هەزار و دهۆک بە 495 هەزار هاوبەش دێن.

کارەبای 24 کاتژمێری بۆ هەمووان

پڕۆژەی ڕووناکی کە لە تشرینی دووەمی 2024 لەلایەن مەسرور بارزانی، سەرۆکوەزیرانی هەرێمی کوردستان ڕاگەیەندرا، ئامانجی ئەوەیە تاوەکو کۆتایی ساڵی 2026 کارەبای 24 کاتژمێری بگەیەنێتە سەرتاسەری هەرێمی کوردستان. لە ئێستادا ناوەندی شارەکان کارەبای بەردەوامیان بۆ دابینکراوە و بەپێی نرخە نوێیەکان، خەرجیی هاووڵاتیان بۆ کارەبا زۆر کەمی کردووە.

پڕۆژەیەک بۆ کەمدەرامەتان

حکومەتی هەرێمی کوردستان جەخت دەکاتەوە کە بەهۆی نرخە نوێیەکانەوە، ئەو بارگرانییە داراییەی لەسەر شانی خەڵک بوو بۆ پارەی مۆلیدە نەماوە. ئێستا هاووڵاتیان بە پارەیەکی کەمتر، کارەبایەکی باشتر و بەردەوامیان هەیە، ئەمەش وایکردووە پڕۆژەکە لەلایەن زۆرینەی خەڵکەوە بەدڵسۆزییەوە پێشوازی لێ بکرێت.