“مووچەی فەرمانبەران مسۆگەر کراوە”

SNN-

جەمال کۆچەر، ئەندامی لیژنەی دارایی پەرلەمانی عێراق رایگەیاند، مووچەی فەرمانبەران مسۆگەركراوە، سەرەڕای ئاستەنگە دارایی و سیاسییەکانی ئێستا هیچ کەمکردنەوە و دواکەوتنێکی بەسەردا نایەت و دەستکاری ناکرێت

ئاماژەی بەوەشکرد، بژاردە لەبەردەستە بۆ زامنكردنی بەردەوامی خەرجکردنی تەنانەت ئەگەر حکومەتی كاربەڕێكەریش لە شوێنی خۆیدا بمێنێتەوە.

جەمال کۆچەر، باسی لەوەشکرد، حکومەت دەتوانێت پەنا بۆ قەرزکردن ببات، وەک پێشتر کاتێک پەرلەمان سێ یاسای قەرزکردنی دەرکرد، حکومەت ئەو كات كاربەڕێكەربوو، وتیشی: ئەم بژاردەیە هێشتا لەبەردەستدایەو دەتوانرێت دووبارە پیادەبكرێت، بە گوێرەی ئاماری نوێ کە لەگەڵ بارودۆخی ئێستادا بگونجێت.

روونیشی کردووتەوە، ئەگەر حکومەت پێکنەهێنرێت و دۆخەکە وەک خۆی بمێنێتەوە، پەرلەمان و حکومەت بەرەو دەرکردنی یاسای نوێی قەرزکردن هەنگاو دەنێن و تاکە چارەسەر كە ئێستادا لەبەردەستدایە قەرزکردنە لە بانکە ناوخۆییەکان.

جەختیشكردووەتەوە، وڵات خاوەنی سەرچاوەی دارایی پێویستییە، بەڵام ئەمە پێویستی بە بەڕێوەبردن و کۆنترۆڵکردنی باشتری ئەم سەرچاوانەیە هەیە لەلایەن دامەزراوە حکومییەکانەوەو زیادكردنی داهاتی ناوخۆ هەنگاوێکی بنەڕەتییە بۆ چارەسەرکردنی ئاستەنگە داراییەکان.