وتەبێژی راكسیۆنی یەكێتی بۆ SNN: سبەی شەممە سەرۆككۆمار هەڵدەبژێردرێت و وەك یەكێتی گەشبینین

عەلی حەمە سەعید-SNN

وتەبێژی فراكسیۆنی یەكێتی لە پەرلەمانی عێراق ئاماژە بەوەدەكات، سبەی شەممە دانیشتنی تایبەت بە هەڵبژاردنی سەرۆككۆمار ئەنجام دەدرێت و سەرۆكی پەرلەمان سورە لەسەر ئەنجامدانی ئەو كۆبوونەوەیە و هاوكات گەشبینین كە پۆستی سەرۆككۆمار بۆ یەكێتی یەكلایی دەبێتەوە.

دیلان غەفور، وتەبێژی فراكسیۆنی یەكێتی لە پەرلەمانی عێراق بەSNNی راگەیاند: ئەو وادەیەی كە بۆ دانیشتنی هەڵبژاردنی سەرۆكکۆمار دیاریكراوە كە سبەی شەممە 11/4/2026 وەك خۆیەتی و زۆرینەی فراكسیۆنەكان ئامادەیی خۆیان بۆ ئەو دانیشتنە دەربڕیوە و ئێمەش وەك فراكسیۆنی یەكێتی ئامادەی ئەو دانیشتنە دەبین.

ئاماژەی بەوەشكرد، سەرۆكی پەرلەمان سورە لەسەر ئەوەی كە دەبێت ئەو دانیشتنە بەڕێوەبچێت و هەر فراكسیۆنێكیش ئامادەی دانیشتنەكە نەبێت یاخود گرفت بۆ دانیشتنەكە دروست بكات، ئەوا ناویان بۆ ڕای گشتی بڵاودەكاتەوە، چونكە بارودۆخی ناوچەكە ئەوە دەخوازێت كە هەڵبژاردنی سەرۆككۆمار و پێكهێنانی حكومەت نابێت لەوە زیاتر دوابكەوێت.

وتەبێژەكەی فراكسیۆنی یەكێتی ئەوەشی خستەڕوو، وەك فراكسیۆنی یەكێتی كۆبوونەوەكانمان لەگەڵ فراكسیۆنەكانی دیكە دەستپێكردووەو و هاوكات تا ئەمڕۆش فراكسیۆنی پارتی خۆیان یەكلایی نەكردووەتەوە و هیچ بەیاننامەیەكی فەرمییان نییە ئاۆ بەشداری دانیشتنەكە دەكەن یاخودنا، بەڵام لەهەموو حاڵەتەكاندا دەرچوونی كاندیدەكەی ئێمە تاڕادەیەكی زۆر یەكلایی بووەتەوە.