بافڵ جەلال تاڵەبانی: یەکێتی هەمیشە پشتیوانی خوشک و برایانی ئێزدی دەبێت

SNN
سەرۆکی یەکێتیی نیشتمانیی کوردستان بەبۆنەی جەژنی چارشەمبا سۆرەوە پیرۆزبایی لە ئێزدییەکان دەکات و جەخت لە پاراستنی ماف و شوناسی ئایینییان دەکاتەوە.

پیرۆزبایی جەژنی سەری ساڵی ئێزدی
بافڵ جەلال تاڵەبانی، سەرۆکی یەکێتیی نیشتمانیی کوردستان، بەبۆنەی جەژنی (چارشەمبا سۆر) و سەری ساڵی ئێزدی، پیرۆزبایی ئاراستەی خوشک و برایانی ئێزدی کرد. تاڵەبانی لە پەیامەکەیدا هیوای خواست ئەم جەژنە ببێتە مایەی خۆشی و ساڵێکی پڕ لە ئاشتی و ئارامی بۆ هەموو لایەک فەراهەم بکات.

ڕێزگرتن لە قوربانیدانی پێکهاتەی ئێزدی
سەرۆکی یەکێتی ئاماژەی بەوە کردووە، ئەو قوربانیدانەی ئێزدییەکان لەپێناو پاراستنی شوناس و تایبەتمەندییە ئایینییەکانیاندا پێشکەشیان کردووە، لای ئەوان رێزلێگیراوە. جەختیشی کردەوە کە مێژووی ئەم پێکهاتەیە پڕە لە خۆڕاگری بەرامبەر ئەو ئاڵانگارییانەی ڕووبەڕووی تایبەتمەندییە ئایینییەکانیان بووەتەوە.

پشتگیریکردنی ماف و ژیانی ئێزدییەکان
بافڵ جەلال تاڵەبانی دووپاتی کردەوە کە یەکێتیی نیشتمانیی کوردستان هەمیشە پشتیوانی ئێزدییەکان دەبێت. ڕاشیگەیاند، پاڵپشتی هەر هەنگاو و پڕۆژەیەک دەکەن کە ببێتە هۆی دەستەبەرکردنی مافەکان و دابینکردنی ژیانێکی باشتر و شایستەتر بۆ تەواوی خوشک و برایانی ئێزدی لە هەر شوێنێک بن.