بافڵ جەلال تاڵەبانی: کەرکوک قەڵای بەهێزی مانەوەمانە و خزمەتکردنی بەردەوام دەبێت

SNN-

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە تیمی کەرکوکی حزبەکەی کرد و ڕایگەیاند، خزمەتکردنی کەرکوکییەکان بەبێ جیاوازی ئەرکی لەپێشینەی یەکێتییە و هیچ دروشم و قسەیەک ساردیان ناکاتەوە.

ستایش بۆ پارێزەرانی سیاسەتەکەی مام جەلال

لە کۆبوونەوەکەدا، بافڵ جەلال تاڵەبانی سوپاسی بێپایانی ئاراستەی هەریەک لە ڕەفعەت عەبدوڵڵا، جێگری سەرۆکی یەکێتی و ئاسۆ مامەند، سەرپەرشتیاری کەرکوک – سەڵاحەدین کرد. جەختی کردەوە کە پەیڕەوکردنی سیاسەتی “چەپکە گوڵەکە”ی سەرۆک مام جەلال لەلایەن ئەوانەوە بۆ خزمەتکردنی کەرکوک، مایەی سەربەرزییە بۆ هەموو یەکێتییەکان.

پشتیوانییەکی تەواو بۆ ڕێبوار تەها

بافڵ جەلال تاڵەبانی بە تایبەت ستایشی ڕۆڵ و خزمەتە بەردەوامەکانی ڕێبوار تەهای کرد و وتی: “شانازی دەکەین کە گەنجی لێهاتووی وەک ئێوە لە ڕیزەکانی پێشەوەی یەکێتیدان”. ڕاشیگەیاند، ڕێبوار تەها لە هەر پێگە و پۆستێکی حزبی یان حکومیدا بێت، پاڵپشتی و پشتیوانیی تەواوەتی بافڵ جەلال تاڵەبانی دەبێت.

پێکەوەژیان بنەمای ئاوەدانییە

سەرۆکی یەکێتی دووپاتیکردەوە کە پێکەوەژیانی نێوان هەموو نەتەوە و پێکهاتەکانی کەرکوک، تاکە ڕێگەیە بۆ دابینکردنی ئارامی و ئاوەدانی شارەکە. ئاماژەی بەوەش کرد، هیچ لایەنێک ناتوانێت بە قسە و دروشم ساردیان بکاتەوە، چونکە کەرکوک بەشێکی زیندووە لە جەستەی یەکێتی و قەڵای بەهێزی مانەوەی حزبەکەیە.

بەردەوامی لەسەر ڕێبازەکەی مام جەلال

لە کۆتایی کۆبوونەوەکەدا، بافڵ جەلال تاڵەبانی سووربوونی یەکێتی بۆ خزمەتکردنی زیاتری شارەکە دووپاتکردەوە و ڕایگەیاند، ئەوان لەسەر ڕێبازە دەوڵەمەندەکەی سەرۆک مام جەلال بەردەوام دەبن بۆ ئەوەی کەرکوک ببێتە نموونەی ئاشتی و گەشەپێدان لە ناوچەکەدا