کەی حاجیانی هەرێمی کوردستان دەچنە سعودیە

SNN-

دوای زنجیرەیەک گفتوگۆ و هەوڵەکان بۆ ئاسانکاری گەشتی حاجیانی هەرێمی کوردستان، بڕیاردرا گەشتەکان بە شێوەیەکی ڕاستەوخۆ لە فڕۆکەخانە نێودەوڵەتییەکانی هەولێر و سلێمانییەوە بۆ شاری جەدەی وڵاتی سعودیە ئەنجام بدرێن.

هەوڵەکان بۆ ڕێکخستنی گەشتی ئاسمانی حاجیان

دوای هەوڵەکانی وەزیرەتی ئەوقاف، لەگەڵ دەستەی گشتی حەج و عومرەی عێراقی و کۆمپانیای فڕۆکەوانی عێراقی، گفتوگۆکان گەیشتنە قۆناغی کۆتایی. بڕیار دراوە بۆ ئەمساڵ گەشتی حاجیان لە هەردوو فڕۆکەخانەی هەولێر و سلێمانییەوە بێت بۆ شاری جەدەی سعودیە، ئەمەش دوای هەماهەنگی تەواو لەگەڵ لایەنە پەیوەندیدارەکانی حکومەتی فیدراڵ و هێڵی ئاسمانی عێراقی.

دیاریکردنی کاتی یەکەم گەشتەکانی حەج

بەگوێرەی خشتەی دیاریکراو، پرۆسەی گواستنەوەی حاجیانی هەرێمی کوردستان لە هەفتەی یەکەمی مانگی 5 دەستپێدەکات. ڕۆژی پێنجشەممە ڕێکەوتی 07/05/2026 یەکەم گەشتی حاجیان لە فڕۆکەخانەی نێودەوڵەتی هەولێرەوە بەرەو وڵاتی سعودیە ئەنجام دەدرێت. هەروەها بڕیار وایە تەنیا یەک ڕۆژ دوای گەشتەکەی هەولێر، واتە ڕۆژی هەینی، گەشتەکانی فڕۆکەخانەی نێودەوڵەتی سلێمانیش بۆ گواستنەوەی حاجیان دەستپێبکات.

ڕاگەیاندنی فەرمی پرۆسەی گواستنەوە

ڕۆژگار جەعفەر، بەرپرسی ڕاگەیاندنی پڕۆسەی حەج، دووپاتی کردووەتەوە کە هەموو ئامادەکارییەکان بۆ دەستپێکردنی گەشتەکان گەیشتوونەتە کۆتایی. ئەم هەنگاوە وەک بەشێک لە پلانی وەزارەتی ئەوقاف دێت بۆ کەمکردنەوەی ماندووبوونی حاجیان و دابینکردنی گەشتێکی ئاسمانی ڕاستەوخۆ لە فڕۆکەخانەکانی هەرێمی کوردستانەوە بۆ ناو خاکی سعودیە