شەپۆلێکی سەرما و بارانی بەهێز بەڕێوەیە

SNN

شارەزایەکی کەشناسی هۆشداری دەدات لە هاتنی شەپۆلێکی بەهێزی بارانبارین و سەرما بۆ هەرێمی کوردستان لە ناوەڕاستی ئەم مانگەدا و ڕایدەگەیەنێت، ئەگەری هەیە لەم ناوچانە سەرو 70 ملیمەتر باران ببارێت و هەندێک شوێنیش بەفر بارین روودەدات.

ئاراس جەبار، شارەزای کەشناسی، لە نوێترین شیکارییدا بۆ نەخشەکانی کەشناسی (GFS) ئاشکرایکردووە، لە نێوان 15 بۆ 19ی ئەم مانگەدا شەپۆلێکی بارانبارینی سەروو ئاسایی ناوچە جیاوازەکانی هەرێمی کوردستان دەگرێتەوە.

ناوبراو روونیکردووەتەوە، بەپێی پێشبینییەکان زۆرترین بڕی باران لە سنووری پارێزگاکانی دهۆک، سلێمانی و هەڵەبجە، هەروەها ئیدارەکانی ڕاپەڕین و سۆران، بەتایبەت لە ناوچە شاخاوییەکانی دهۆک دەبێت، کە بڕەکەی لە نێوان 40 بۆ 70 ملم دەبێت.

جەختیکردووەتەوە، شەپۆلەکە سەرچاوەکەی نزمەپاڵەپەستۆیەکی جەمسەریی ساردە کە سەرەتا کاریگەری لەسەر ئەوروپا دەبێت و دواتر لە ڕێگەی دەریای ناوەڕاستەوە دەگاتە ناوچەکە. لەگەڵ گەیشتنی شەپۆلەکەش لە سەرەتای هەفتەی داهاتوودا، ئەگەری چالاکبوونی بەهێزی با، خۆڵبارین، دابەزینی بەرچاوی پلەکانی گەرما و بارینی بەفر لەسەر چیا بەرزە سنوورییەکان هەیە.

لە کۆتایدا دەڵێت: هێشتا پێشبینییەکان سەرەتایین و لە دوو بۆ سێ ڕۆژی داهاتوودا گۆڕانکاری و زانیاریی وردتر دەردەکەون.