هەدەپە بە ستراتیجی نوێوە رووبەڕووی پارتی فەرمانڕەوا دەبێتەوە
دیمەنێک لە رێپێوانی پێشتری هەدەپە وێنە: AP
SNN
لەدوای دەستگیرکردنی دوو پەرلەمانتاری سەر بە هەدەپە، ئەو پارتە ستراتیجی نوێ دەگرێتەبەر و لە هەوڵدایە شەقامی باکوری کوردستان و تورکیا دژ بە دەسەڵات بجوڵێنێت.
بە گوێرەی ڕۆژنامەی حوریەتی تورکی، لیژنەی بڕیاردەری پارتی هەدەپە، کۆبوونەوەیەکی نائاسایی ئەنجامداوە سەبارەت بە داڕشتنەوەی نەخشەڕێگای پارتەکە و تاوتوێی بژاردەکانی بەردەمی کردووە تا لەو ڕێگەیەوە هەڵوێست دژ بە دەستگیرکردنی ئەندام و پەرلەمانتارەکانی نیشان بدات.
ئیبرو گیونەی وتەبێژی هەدەپەش بە میدیاکانی راگەیاندووە: دوو رێپێوانی فراوان لە 15ی ئەم مانگەدا رێکدەخەن، کە یەکێکیان لە شاری ئەدرنەی رۆژئاوای تورکیاوە دەستپێدەکات و بەشداربووەکان بەرەو ئەنقەرەی پایتەخت دەڕۆن.
ئاماژەی بەوەشکرد: رێپێوانەکەی دیکە لە هەمان رۆژدا دەستپێدەکات و لە شاری جولەمێرگی باکوری کوردستانەوە بەرەو ئەنقەرە ئەنجام دەدرێت.
وتەبێژەکەی هەدەپە رایگەیاندووە: رێپێوانەکان لە ژێر ناوی “دادپەروەری و ئازادی”دا دەبنن و پەروین بوڵدان و میتحەد سانجار هاوسەرۆکانی هەدەپە بەڕێوەی دەبەن.
ئەم ستراتیجییە نوێیەی هەدەپە، لە کاردانەوەی ئەوەدایە، چەند رۆژێک لەمەوبەر هەردوو پەرلەمانتارى هەدەپە لەيلا گوڤەن و موسا فاريسئۆغڵو كە پارێزبەندييان لەسەر هەڵگیراوە بە تۆمەتی پەیوەندی بە پارتی کرێکارانی کوردستانەوە، دەستگیرکران.
تا ئێستا دەیان هەزار ئەندام و لایەنگری هەدەپە لە تورکیا دەستگیرکراون و زۆرینەشیان تۆمەتباردەکرێن بەوەی کە ئەندامی پەکەکە بن.
