دابەشكردنی مووچەی مامۆستایان و فەرمانبەرانی گرێبەست كەوتە هەفتەی داهاتوو

عەلی حەمە سەعید-SNN

نوێنەری گشتی مامۆستایانی گرێبەست ئاماژە بەوەدەكات لەلایەن وەزارەتی دارایی ئاگادار كراوینەتەوە كە بڕیارە رۆژی یەكشەممە دەست بكرێت بە دابەشكردنی مووچەی مامۆستایانی گرێبەست و ئەو فەرمانبەرانەی لەسەر داهاتی ناوخۆ دامەزراون.

عەلی رەئووف نوێنەری گشتیی مامۆستایانی گرێبەست بە SNNی ڕاگەیاند: هەرچەندە چاوەڕێمان دەكرد كە مووچەی مامۆستایان و فەرمانبەرانی گرێبەست ئەمرۆ دابەشبكرێت، بەڵام هەفتەی داهاتوو مامۆستایانی گرێبەستی پەروەردە و خوێندنی باڵا، لەگەڵ ئەو فەرمانبەرانەی بە گرێبەست دامەزراون مووچەكانیان وەردەگرن.

ئاماژەی بەوەشكرد، جگە لە مامۆستایانی گرێبەست كە وابڕیارە یەكشەممەی داهاتوو مووچەكانیان وەربگرن، هاوكات ئەو فەرمانبەرانەشی كە لەسەر داهاتی ناوخخۆ دامەزراون ئەوانیش یەكشەممە مووچەكانیان پێدەدرێت.

بەگوێرەی ئامارەكانی وەزارەتی دارایی حكومەتی هەرێم، تا ئێستا 37 هەزار و 933 مامۆستا لە وەزارەتی پەروەردە و چوار هەزار و 100 مامۆستای زانكۆ و پەیمانگەكانی سەربە وەزارەتی خوێندنی باڵا و توێژینەوەی زانستی، بەشێوەی گرێبەست دامەرزاون و لەسەر داهاتی ناوخۆ مووچەیان دابین دەكرێت