مەزڵووم عەبدی: ئامادەکاری بۆ سەردانم بۆ تورکیا دەکرێت و ئەگەری هەیە چاوم بە ئۆجالان بکەوێت

SNN-

مەزڵووم عەبدی، فەرماندەی گشتیی هێزەکانی سووریای دیموکرات (هەسەدە)، لە چاوپێکەوتنێکدا لەگەڵ ماڵپەڕی “ئەلمۆنیتۆر” چەند زانیارییەکی گرنگ سەبارەت بە پەیوەندییەکانیان لەگەڵ تورکیا، دیمەشق و ئەمریکا ئاشکرا کرد.

سەردانی تورکیا و دیدار لەگەڵ ئۆجالان

مەزڵووم عەبدی ڕایگەیاند کە ئامادەکاری بۆ سەردانێکی ئەو بۆ وڵاتی تورکیا لە ئارادایە و ڕێوشوێنەکان دەستیان پێکردووە. ئاماژەی بەوەش کرد، لە چوارچێوەی ئەم سەردانەدا ئەگەری هەیە لە ماوەی داهاتوودا دیدارێک لەگەڵ عەبدوڵا ئۆجالان، ڕێبەری دەستبەسەرکراوی پەکەکە لە زیندانی ئیمرالی ئەنجام بدات.

تێکەڵبوونی هەسەدە لەگەڵ سوپای سوریا

سەبارەت بە داهاتووی ڕۆژئاوای کوردستان و پەیوەندییان لەگەڵ ڕژێمی ئەسەد، فەرماندەی گشتیی هەسەدە ئاشکرای کرد:

ئامانجی سەرەکییان جێبەجێکردنی ڕێککەوتنی تێکەڵبوونە لەگەڵ دیمەشق.

پرۆسەی یەکخستنی هێزە سەربازییەکان و دامەزراوەکانی بەڕێوەبەریی خۆسەر لە چوارچێوەی دەوڵەتی سوریادا بەردەوامە، بەڵام بە مەرجی پاراستنی تایبەتمەندیی ناوچە کوردییەکان.

مەزڵووم عەبدی جەختی کردەوە کە ئەو پۆستانەی لەلایەن دیمەشقەوە پێشنیاری بۆ کرابوون ڕەتیکردوونەتەوە، چونکە لە ئێستادا تەنها سەرنجیان لەسەر تەواوکردنی پرۆسەی تێکەڵبوون و بەهێزکردنی یەکڕیزیی ناوخۆیی کوردە.

وەڵامێکی توند بۆ دۆناڵد ترەمپ

لە وەڵامی لێدوانەکەی دۆناڵد ترەمپ، سەرۆکی ئەمریکا، کە وتبووی “کورد ئەگەر پارەیان پێبدرێت باش شەڕ دەکەن”، مەزڵووم عەبدی بە توندی ئەو تۆمەتەی ڕەتکردەوە کە هێزەکانیان “بەکرێگیراو” بن و وتی: “زانیاریی تەواو هەڵە بە ترەمپ دراوە.”

ناوبراو ڕوونیکردەوە کە هاوکارییە داراییەکانی ئەمریکا تەنها بۆ پشتیوانیکردنی شەڕی هاوبەشی دژی داعش تەرخان کرابوون، نەک وەک مووچە بۆ کڕینی چەکدار.