مەکتەبی سیاسیی یەکێتیی “سزادانی عەجاج وانەیەکە بۆ هەموو نەیارانی گەلی کوردستان؛ دادی دادپەروەری هەر دێت”

SNN

مەکتەبی سیاسیی یەکێتیی نیشتمانیی کوردستان پیرۆزبایی لە کەسوکاری ئەنفالکراوان دەکات بە بۆنەی دەرچوونی بڕیاری حوکمدان بەسەر “عەجاج”ی جەللادی نوگرە سەلماندا.

گۆڕەپانی تۆڵەی مێژوویی
دوای بڕیارەکەی ئەمڕۆ پێنجشەممە (14-5-2026)ی دادگای رەسافە لە بەغداد، مەکتەبی سیاسیی یەکێتی لە ڕاگەیەندراوێکدا ئەو دادگاییکردنەی بە “گۆڕەپانی تۆڵەی ڕەوای مێژوو” وەسف کرد. عەجاج ئەحمەد حەردان تکریتی، کە وەک بەدناوترین تاوانباری رژێمی بەعس ناوی دەهێنرێت، ئەمڕۆ بە فەرمی بە سزا گەیشت.

دێوەزمەیەک لە پشت دێوەزمەی بەعسەوە
لە ڕاگەیەندراوەکەدا هاتووە، عەجاج ئەو کەسە بوو کە قێزەونترین تاوانی ڕۆژانەی بەرامبەر بە ژنان، منداڵان و پیرانی زیندانی نوگرە سەلمان ئەنجامداوە و دێوەزمەیەکی سەرباری رژێمی بەعس بووە بۆ سەر گەلەکەمان.

وانەیەک بۆ داهاتوو
مەکتەبی سیاسیی یەکێتی پێیوایە، سزادانی عەجاج وانەیەکی گەورەیە بۆ هەموو دوژمن و نەیارانی گەلی کوردستان، کە درەنگ یان زوو، ڕۆژی دادپەروەری دێت و تاوانباران لە سزا ڕزگاریان نابێت. یەکێتی جەخت لەسەر ئەوە دەکاتەوە کە ئەم دەستکەوتە، بەشێکە لە هەوڵەکان بۆ بەدیهێنانی ئاواتی گەل و پاراستنی شکۆی ئەو قوربانییانەی لەپێناو دادپەروەریدا دراون.

پیرۆزبایی لە کەسوکاری قوربانییان
لە کۆتایی ڕاگەیەندراوەکەدا، مەکتەبی سیاسی پیرۆزبایی لە کۆمەڵانی خەڵکی کوردستان و بەتایبەتی کەسوکاری ئەنفالکراوان دەکات و دەڵێت: “هیوادارین ئەم بڕیارە ڕۆحی شەهیدان ئاسوودە بکات و هەنگاوێک بێت بەرەو ئینساف بۆ زۆرلێکراوانی میللەتەکەمان”.