مەسعود پزشكیان سوپاسی هەڵوێستی ئەخلاقی و دادگەرانەی پاپای ڤاتیكان دەكات

SNN

مەسعود پزشكیان سوپاسی هەڵوێستی ئەخلاقی و دادگەرانەی پاپای ڤاتیكان دەكات لەبارەی هێرشەكانی ئەمریكاو ئیسرائیل
“ئەو رێبازە وێرانکەرەی ئەمریکا و ئیسرائیل گرتوویانەتەبەر تەنیا ئێران ناکەنە ئامانج “

مەسعود پزشكیان، سەرۆككۆماری ئێران لە نامەیەكدا بۆ پاپای ڤاتیكان نوسیویەتی:سوپاستان دەکەم بۆ هەڵوێستی ئەخلاقی و لۆژیکی و دادپەروەرانەتان سەبارەت بە هێرشەكانی ئەمریکا، کە بۆجاری دووەم و لە گەرمەی دانوستانەکان و بە پاساوی درۆ و پێشێلکردنی ئاشکرای یاسا نێودەوڵەتییەکان و بە پشتیوانی رژێمی ئیسرائیل ئەنجامیداوە.

بەگوێرەی ئاژانسی فارس، پزیشكیان رایگەیاندوە، سەرۆکی ئەمریکا لێدوانی مەترسیدارو شەرمەزارانەی داوە، کە بەنیازە شارستانیەتی مێژوویی ئێران لەناو ببات و بیگەڕێنێتەوە بۆ چاخی بەردین، وەک بەڕێزتان ئاماژەتان پێکردووە، ئەم قسانە بەرهەمی وەهمێکی دەسەڵاتی رەهایە، کە لەسەر بنەمای لووتبەرزی و زاڵبوون و سەرپێچییە، هەوڵێکە بۆ چارەسەرکردنی ناکۆکییەکان لە ڕێگەی توندوتیژییەکی بێ سنوورەوە، کە ویژدانی مرۆڤ ناتوانێت لێی تێبگات یان قبوڵبکات.

ئاماژەی بەوەشكردووە، ئەو رێبازە وێرانکەرەی ئەمریکا و رژێمی ئیسرائیل گرتوویانەتەبەر و هێرشە ناشەرعییەکانیان تەنیا ئێران ناکەنە ئامانج، بەڵکو سەروەری یاسا لە گۆڕەپانی نێودەوڵەتی و یاسای نێودەوڵەتی و بەها مرۆییەکان و رێنماییە ئایینەکانی ئیبراهیمیش دەکەنە ئامانج، كە روونە دەرئەنجامەکانی ئەم رێبازە بۆ هەموو کۆمەڵگەی نێودەوڵەتی ترسناکن.