نەخۆشخانەی هیوا دەبێتە دیجیتاڵ و ئامێری ڕێگری لە هەڵوەرینی قژی خانمان دابین دەکات

SNN-

بەڕێوەبەری نەخۆشخانەی هیوا پڕۆژەیەکی نوێی بۆ دیجیتاڵکردنی زانیارییەکانی نەخۆش و دابینکردنی چەند ئامێرێکی نوێی پزیشکی بۆ خانمان ڕاگەیاند.

ڕاگەیاندنی ئەپلیکەیشنی تایبەت بە نەخۆش

د. یاد نەقشبەندی، بەڕێوەبەری نەخۆشخانەی هیوا، لە ڕۆژی 18ـی ئایاری 2026 ڕایگەیاند کە نەخۆشەکانیان لەمەودوا دەتوانن لە ڕێی ئەپلیکەیشنێکی تایبەتەوە دەستیان بە هەموو زانیاری و مێژووی نەخۆشییەکانیان بگات. بەپێی وتەی بەڕێوەبەری نەخۆشخانەکە، هەر نەخۆشێک بچێتە هەر نەخۆشخانەیەکی دیکە، دەتوانێت لە ڕێی مۆبایلەکەیەوە مێژووی پزیشکییەکەی نیشانی دکتۆرە پسپۆڕەکان بدات. د. یاد ئاماژەی بەوەش کرد کە جێبەجێکردنی ئەم پڕۆژەیە ئامانج و خەونێکی ئەو بووە لە سەرەتای دەستبەکاربوونی وەک بەڕێوەبەر.

بەڕێوەبردنی 60 ملیۆن زانیاری

بەڕێوەبەری نەخۆشخانەی هیوا ئاشکرای کرد کە سیستمی ناو نەخۆشخانەکە 60 ملیۆن زانیاریی تێدایە. ڕوونیکردەوە کە بەکارهێنانی ڕێگەی تەقڵیدی و کاغەز بۆ ئەم قەبارە زۆرەی زانیاری کارێکی یەکجار قورس بووە، چونکە ئەگەر نەخۆشێک بیویستایە زانیارییەکانی ببات بۆ شوێنێکی دیکە، دەبوو چەندین فایلی گەورە لەگەڵ خۆی بگوێزێتەوە. د. یاد جەختی کردەوە کە سروشتی نەخۆشەکانی هیوا جیاوازە و پەیوەندییان لەگەڵ نەخۆشخانەکە بۆ ماوەیەکی درێژخایەن و تا کۆتایی ژیانیانە، نەک تەنیا بۆ ڕۆژێک یان دوو ڕۆژ.

دابینکردنی ئامێری نوێ بۆ خانمان

لە تەوەرێکی دیکەی قسەکانیدا، بەڕێوەبەری نەخۆشخانەی هیوا ڕایگەیاند کە وەک یەکەم نەخۆشخانەی حکومی، 5 ئامێری نوێیان بۆ خانمان دابینکردووە کە کاردەکەن بۆ ئەوەی کەمترین ڕێژەی قژ و مووی نەخۆشەکان هەڵوەرێت. ئاماژەی بەوەش کرد کە لە داهاتوویەکی نزیکدا 10 ئامێری دیکە لە هەمان جۆر بۆ نەخۆشخانەکە دابین دەکرێن.

فراوانکردنی خزمەتگوزارییەکان بۆ هەولێر و دهۆک

د. یاد نەقشبەندی ئاماژەی بەوەش کرد، لەسەر داوای ئەو و نەخۆشخانەی هیوا، داواکارییان پێشکەش کردووە تاوەکو هاوشێوەی ئەو ئامێرانەی بۆ نەخۆشخانەی هیوا دابینکراون، بۆ نەخۆشخانەکانی شارەکانی هەولێر و دهۆکیش دابین بکرێن، تاوەکو نەخۆشەکانی ئەو شارانەش لەو خزمەتگوزارییە پزیشکییە سوودمەند ببن.