ترەمپ: سزاکانی سەر تاران سووک ناکەین و ڕەنگە شەڕ لە دژی ئێران دەستپێبکەینەوە

SNN – 

دۆناڵد ترەمپ، سەرۆکی ئەمریکا لە نوێترین لێدوانی توندیدا سەبارەت بە کۆماری ئیسلامی ئێران ڕایگەیاند، واشنتۆن بە چڕی چاودێری سنوورەکانی دەکات و هیچ نەرمیەکیش لە بەرامبەر تاران نیشان نادات، ئاماژەی بەوەشکرد کە سزا ئابوورییەکانی سەر ئەو وڵاتە سووک ناکرێن.

وتیشی: “ئێمە سنوورەکانمان بە باشی داخستوون؛ لە ڕووی سەربازی و سیاسییەوە، چینی یەکەم، دووەم و تەنانەت دەتوانم بڵێم چینی سێیەمی سەرکردایەتی لە ئێران کۆتایی پێهاتووە، لە ئێستادا هێزی دەریایی ئێرانمان لەناوبردووە و دراوی نیشتمانی ئەو وڵاتەش هیچ بەهایەکی نەماوە.”

سەبارەت بە ئەگەری ڕێککەوتن و دۆخی ناوخۆیی تاران، ترەمپ ئاماژەی بەوەشکرد: “ئێران لە ئێستادا زۆر بەپەرۆشە بۆ ئەوەی ڕێککەوتنێک واژۆ بکات، بەڵام ئێمە لە بەرامبەر دەستبەرداربوون لە پیتاندنی یۆرانیۆمی ئاست بەرز، سزاکانی سەر ئەو وڵاتە سووک ناکەین و تەنانەت ڕەنگە جەنگی ئێران دەستپێبکەینەوە.”

لە پەیامێکی ئاڕاستەکراویشدا بۆ جەی دی ڤانس، جێگری سەرۆکی ئەمریکا، ترەمپ داوای لێکرد: “تکایە زۆر ڕەق و توند بە لەگەڵ ئێرانییەکان.”