عالیە نوسەیف: سەرۆکوەزیران شەڕێکی کراوەی دژی گەندەڵی راگەیاندووە

SNN-

ئەندامێکی پەرلەمانی عێراق پشتیوانی خۆی بۆ هەنگاوەکانی سەرۆکوەزیران لە ڕووبەڕووبوونەوەی گەندەڵی دەردەبڕێت و ڕایدەگەیەنێت، عێراق لەبەردەم قۆناغێکی نوێی پاککردنەوەی دامەزراوەکاندایە.

عالیە نوسەیف، پەرلەمانتاری عێراق، لە هەژماری خۆی لە تۆڕی کۆمەڵایەتی “ئێکس” ئاماژەی بەوە کردووە، کە سەرپەرشتیکردنی کۆبوونەوەی وردبینیکردنی گرێبەستە حکومییەکان و پێکهێنانی “ئەنجومەنی سیادی بۆ دەستپاکی” لەلایەن عەلی زەیدی، سەرۆک وەزیرانەوە، وەک ڕاگەیاندنی جەنگێکی ڕاستەوخۆ و کراوە وایە دژی گەندەکاران.

نوسەیف جەختی لەوەش کردەوە، کە ئەم هەنگاوانە دەبنە هۆی گەڕانەوەی ملیۆنان دۆلار لەو سامانە گشتییەی تاڵان کراوە. وتیشی: “چاوەڕوانین دۆسیە گەورەکانی پەیوەست بە گرێبەستە حکومییەکان، موڵک و ماڵی دەوڵەت و کەرتی وەبەرهێنان هەڵبدرێنەوە و چاکسازی ڕیشەیی لە دامەزراوەکاندا بکرێت.”