SNN-
بافڵ جەلال تاڵەبانی، سەرۆکی یەکێتیی نیشتمانیی کوردستان بە بۆنەی کۆچی دوایی کەسایەتى دیارى ئایینی، ئایەتوڵڵا شێخ محەمەد ئیسحاق فەییاز، پەیامێکی سەرەخۆشیی بڵاوکردەوە.
کۆچکردنێکی پڕ لە خەسارەت
بافڵ جەلال تاڵەبانی لە پەیامەکەیدا بە خەم و پەژارەیەکی زۆرەوە هەواڵی کۆچی دوایی مەرجەعی ئایینی، ئایەتوڵڵا عوزما شێخ محەمەد ئیسحاق فەییاز ڕادەگەیەنێت. سەرۆکی یەکێتی ئاماژە بەوە دەکات، کۆچی دوایی ئەم مەرجەعە گەورەیە خەسارەتێکی گەورەیە بۆ گەلەکەمان.
خزمەتکارێکی میانڕەو
لە دیدی سەرۆکی یەکێتییەوە، ئایەتوڵڵا فەییاز ڕۆڵێکی دیار و گرنگی لە خزمەتکردنی ئایینی پیرۆزی ئیسلام، وتنەوەی زانستەکان و بڵاوکردنەوەی بەهاکانی میانڕەوی و لێبوردەییدا هەبووە. بافڵ جەلال تاڵەبانی جەخت لەوە دەکاتەوە، کۆچکردوو بەشدارێکی کاریگەر بووە لە چەسپاندنی ئاشتیی کۆمەڵایەتی و یەکڕیزیی نیشتمانیدا.
پرسە و هاوخەمی
بافڵ جەلال تاڵەبانی، پرسە و سەرەخۆشیی خۆی ئاڕاستەی بنەماڵەی مەرجەع، مەرجەعییەتی باڵای ئایینی لە نەجەفی ئەشرەف، زانایانی ئایینی، فێرخوازانی حەوزەی زانستی و سەرجەم گەلی عێراق دەکات. لە کۆتاییشدا دەڵێت: “لە خوای گەورە دەپارێینەوە مەرجەعی کۆچکردوو بخاتە بەر ڕەحمەتی خۆی و لە بەهەشتی بەرینیدا جێگەی بکاتەوە”.
