بلومبێرگ دەقی خاڵە دزەپێکراوەکانی ڕێککەوتنی ئەمریکا و ئێران بڵاودەکاتەوە؛ ڕۆژی هەینی واژۆ دەکرێت

SNN-

ئاژانسی “بلومبێرگ”ی ئەمریکی، زانیاریی ورد و دزەپێکراوی لەبارەی خاڵەکانی نێو یاداشتی لێکگەییشتنی ئەمریکا و ئێران بۆ گەیشتن بە ڕێککەوتنی کۆتایی بڵاوکردەوە. بڕیارە دۆناڵد ترەمپ، سەرۆکی ئەمریکا بە فەرمی ناوەڕۆکی ئەم خاڵانە ڕابگەیەنێت و ڕۆژی هەینی، 19ی حوزەیرانی 2026 لە وڵاتی سویسرا بە فەرمی لەلایەن هەردوولاوە واژۆ بکرێت.

دەقی خاڵە دزەپێکراوەکانی یاداشتی لێکگەییشتنەکە:

1- ڕاگرتنی هەمیشەیی جەنگ: تاران و واشنتن و هاوپەیمانەکانیان دەسبەجێ و بۆ هەمیشە جەنگ لە سەرجەم بەرەکانەوە دەوەستێنن.

2-کۆتاییهێنان بە هەڕەشەکان: واشنتن و تاران و هاوپەیمانەکانیان بەڵێن دەدەن کە هیچ کردەیەکی دوژمنکاری و هەڕەشەیەک لە دژی یەکتر ئەنجام نەدەن.

3- مۆڵەتی دانوستان: ئەمریکا و ئێران بەڵێن دەدەن کە لە ماوەی 60 ڕۆژدا بگەنجە ڕێککەوتنی کۆتایی، هەروەها ئەگەری درێژکردنەوەی ئەو ماوەیەش بە ئاسایی تەماشا دەکرێت.

4-هەڵگرتنی گەمارۆی دەریایی: ویلایەتە یەکگرتووەکانی ئەمریکا دوای واژۆکردنی یاداشتەکە، دەسبەجێ گەمارۆی دەریایی لەسەر ئێران هەڵدەگرێت.

5- کشانەوەی هێزەکانی ئەمریکا: ئەمریکا بەڵێن دەدات کە هێزەکانی لە ماوەی 30 ڕۆژدا لە دوای واژۆکردنی ڕێککەوتنی کۆتایی، لە ناوچەکە بکشێنێتەوە.

6- ئاساییکردنەوەی گەرووی هورمز: ئێران بۆ ماوەی 30 ڕۆژ گەرووی هورمز بە تەواوی ئاسایی دەکاتەوە، لەگەڵ پێویستیی هەڵگرتنی سەرجەم کۆسپ و بەربەستەکان.

7- بووژانەوەی ئابووری ئێران: واشنتن بەڵێن دەدات بە هاوکاریی هاوبەشە نێودەوڵەتییەکانی، دووبارە ئێران لە ڕووی ئابووری و ئاوەدانکردنەوەوە ببووژێنێتەوە.

8- خشتەی هەڵگرتنی سزاکان: واشنتن پابەند دەبێت بە هەڵگرتنی سزاکانی سەر ئێران بەگوێرەی خشتەیەکی کاتی، کە هەردوولا وەک بەشێک لە ڕێککەوتنی کۆتایی لەسەری ڕێکدەکەون.

9- دەستبەرداربوون لە چەکی ئەتۆمی: ئێران دووپاتی دەکاتەوە کە بە هیچ شێوەیەک و بۆ هەمیشە، نایەوێت چەکی ئەتۆمی بەرهەم بهێنێت.

10 چارەنووسی یۆرانیۆم: تاران و واشنتن لەسەر چۆنییەتی مامەڵەکردن لەگەڵ یۆرانیۆمی پیتێنراو و بابەتەکانی تری پێوەست بە بەرنامەی ناووکی، لە ڕێککەوتنی کۆتاییدا دەگەنە بڕیاری بنبڕ و یەکلاییکەرەوە.

11-پاراستنی دۆخی ئێستا: تاران و واشنتن هاوڕان لەسەر پاراستنی دۆخی ئێستای ناوچەکە، تا ئەو کاتەی دەگەن بە ڕێککەوتنی کۆتایی.

12- ڕاگرتنی سزای نوێ: ئێران بەرنامەی ناووکیی خۆی لە ئێستادا ڕادەگرێت، بێ ئەوەی واشنتن سزای نوێی بەسەردا بسەپێنێت یان هێزی زیاتر لە ناوچەکەدا کۆبکاتەوە.

13 فرۆشتنی نەوت و خزمەتگوزاری بانکی: واشنتن بەڵێن دەدات کە ڕێگە بە هەناردهەکردنی نەوتی ئێران بۆ دەرەوە و کاراکردنەوەی خزمەتگوزارییە بانکییەکان لەو وڵاتەدا بدات.

14 ئازادکردنی پارە بلۆککراوەکان: واشنتن بەڵێن دەدات کە سەرجەم دارایی و پارە بلۆککراوەکانی ئێران لە بانکەکانی جیهاندا ئازاد بکات.

15دەستپێکردنی دەستبەجێی گفتوگۆکان: دوای گەرەنتییکردنی جێبەجێکردنی بەشێک لەم خاڵانە، دەسبەجێ هەردوو وڵات دەست بە گفتوگۆی چڕ دەکەن بۆ دانوستان لەسەر ڕێککەوتنی کۆتایی.