نێچیرڤان بارزانی دێتە سلێمانی
SNN-
ئەمڕۆ یەکشەممە 21ی حوزەیرانی 2026، بە ئامادەبوونی نێچیرڤان بارزانی، سەرۆکی هەرێمی کوردستان، ئاهەنگی دەرچوونی خولی 5ـی پێگەیاندنی خوێندکاران لە کۆلێژی سەربازیی قەڵاچوالان لە پارێزگای سلێمانی بەڕێوەدەجێت. لەم مەراسیمەدا، بڕوانامە و پلەی ئەفسەریدەبەخشرێتە 210 خوێندکار کە توانیان دوای 9 مانگ لە مەشق و ڕاهێنانی سەربازیی چڕ و بەردەوام، خولەکە بە سەرکەوتوویی کۆتایی پێبهێنن.
سەرجەم بەشداربووانی ئەم خولە گەنجانی کورد و خەڵکی شار و ناوچە جیاوازەکانی هەرێمی کوردستانن، کە یەکێک لە مەرجە سەرەکییەکانی وەرگرتنیان لە کۆلێژەکە، بوونی بڕوانامەی بەکالۆریۆس بووە لە بوارە زانستی و مرۆییە جیاوازەکاندا. ئەم خولە کە تایبەت بووە بە ڕەگەزی نێر، بە ئامانجی پێگەیاندنی کادیری ئەکادیمی و بەهێزکردنی ڕیزەکانی هێزی پێشمەرگە و هێزە ئەمنییەکان بە گەنجانی خاوەن بڕوانامە ڕێکخرابوو.
دەرچووانی ئەم خولە پێشتر لە ناو هێزە ئەمنی و سەربازییەکانی کوردستاندا وەک کارمەند خزمەتیان کردووە، بەڵام لەمەودوا بە پلەی ئەفسەر بەسەر وەزارەتەکانی ناوخۆ و پێشمەرگەدا دابەش دەبن. لە کۆی گشتی دەرچووان، 56 خوێندکاریان سەر بە هێزەکانی بەرگری و فریاکەوتن لە وەزارەتی ناوخۆن، هەروەها 154 خوێندکاریشیان سەر بە وەزارەتی پێشمەرگەن، کە لەو ژمارەیەش 131 ئەفسەریان لە چوارچێوەی هێزەکانی 70ـی پێشمەرگەدا دەستبەکار دەبن.
بڕیار وایە دوای تەواوبوونی سەرجەم ڕێکارەکانی مەراسیمی وەرگرتنی پلەکانیان، ئەم ئەفسەرە نوێیانە بگەڕێنەوە بۆ ئەو یەکە و شوێنی کارانەی کە پێشتر تێیدا خزمەتیان کردووە. ئەوان لەمەودوا وەک ئەفسەری ئەکادیمی و شارەزا لە بوارەکەی خۆیاندا ئەرکەکانیان ڕادەپەڕێنن، بەو ئامانجەی ئەو ئەزموون و بنەما سەربازییانەی لە ماوەی 9 مانگی ڕابردوودا خوێندوویانە، بخەنە خزمەت پەرەپێدان و بەهێزکردنی زیاتری توانا بەرگرییەکانی هەرێمی کوردستان.
