لە هەولێر بتڵێك غاز گەیشتە 18هەزار و هاووڵاتیان لە بەنزینخانەكانیش غازیان دەستناكەوێت

عەلی حەمە سەعید-SNN

بە وتەی هاووڵاتیانی دانیشتووی شاری هەولێر، لە دوێنێوە قەیرانی نەمانی غازی ماڵان سەریهەڵداوە و ئەو بەنزینخانانەشی كە غازیان هەیە ئامادەنین بەهاووڵاتیانی بفرۆشن، هاوكات هەر ئەمڕۆ نرخی بوتڵێك غازی ماڵان گەیشتووەتە زیاتر لە 18 هەزار دینار لە سنوری هەولێر، بەوتەی لایەنە پەیوەندیدارەكانی سلێمانی و هەڵەبجە تا ئێستا دۆخەكە ئاساییە و دابەشكردنی غازی ماڵان بەردەوامی دەبێت.

وەلید سادق، یەكێك لە هاووڵاتیانی دانیشتووی شاری هەولێر بە SNNی ڕاگەیاند: ئەمڕۆ سەردانی چەند بەنزینخانەیەكی شاری هەولێرم كرد بۆ ئەوەی بتوانێك بوتڵێك غازم دەستبكەوێت بەڵام ئامادە نەبوون غاز بفرۆشن، بەوتەی خۆیان ئامادەنین غاز بە هاووڵاتیان بفرۆشن بەڵكوو دەبێت لەڕێگەی بریكارەكانەوە غازمان بۆ دابینبكرێت، لەكاتێكدا بریكارەكانیش دەڵێن بەم زووانە چاوەڕێی غاز مەكەن.

ئاماژەی بەوەشكرد، ئەو غازەی ئێستا لە بازاڕ هەیە بتڵێكی گەیشتووەتە 18 هەزار دینار و دەستیش ناكەوێت، بۆیە هاووڵاتیان ڕوو بەڕووی دۆخێكی ناهەموار بووینەتەوە و لەگەڵ نەبوونی غاز كارەباشمان بڕاوە لەم كاتی گەرمایەدا كە زۆر پێویست بوو كارەبا دابین بكرێت.

پێشتریش، بابان ئەحمەد سەرۆكی لیژنە هاوبەشەكانی قایمقامییەتی سلێمانی ڕایگەیاند، بڕێكی زۆرباش لە غازی كۆگەكراومان هەیە و پێشبینی دەكەین، تا دوو مانگی تر كێشەی كەمیی غازمان بۆ دروست نەبێت، هەروەها داواكارین لەو ڕووەوە ترس و دڵەڕاوكێ بۆ هاووڵاتییان دروست نەكرێت.

هاوكات لە بەدواداوچوونێكی SNNدەردەكەوێت كە تا ئێستا گرفتی كەمی غازی ماڵان لە سنوری پارێزگای هەڵەبجەش سەری هەڵنەداوە و بریكارەكان بەگوێرەی ئەو بەرنامەیەی پێشر هەیانبووە بەردەوامن لە دابینكردنی غازی ماڵان بە نرخی پاڵپشتیكراوی 8 هەزار و 500 دینار بۆ هەر بتڵێك غاز،  بەڵام نرخی غازە بازرگانییەکە لە هەڵەبجە لیتری بە 600 دینارە بەوپێیەش نرخی بوتڵێک غازی ماڵان بە 12 هەزار دینارە، لە سلێمانی لیتری بە 500 دینارە و بتڵی دەکاتە 10 هەزار دینار، لە هەولێر لیتری بە 800 دینارە و بتڵی دەکاتە 18 هەزار دینار.