حکومەتی هەرێم لەسەر ناردنی غازی کۆرمۆر بۆ بەغدا وەڵامی توندی “دانا غاز” و “کرێسنت” دەداتەوە
SNN –
حکومەتی هەرێمی کوردستان ڕاگەیەندراوێکی فەرمی لەبارەی دەستپێکردنی دابینکردنی غازی سروشتی لە کێڵگەی کۆرمۆرەوە بۆ وەزارەتی کارەبای عێراق بڵاوکردەوە و بڕیاری تاکلایەنەی هەردوو کۆمپانیای “دانا غاز” و “کرێسنت پترۆلیۆم” بە پێشێلکاریی روونی یاسایی و گرێبەستەکان وەسف دەکات.
لە ڕاگەیەندراوەکەی حکومەتی هەرێمدا هاتووە
ڕەتکردنەوەی بڕیارە تاکلایەنەکە
حکومەتی هەرێم ئاماژە بەوە دەدات کە تەنها لە ڕێگەی ڕاگەیەندراوی فەرمیی کۆمپانیاکانەوە لە 4ی ئابی 2026 ئاگاداری ئەم هەنگاوە بووە و بە هیچ شێوەیەک ڕەزامەندیی پێشوەختەی لەسەر نەداوە.
پێشێلکردنی گرێبەستەکە
ئەم کردارەی کۆمپانیاکان بە پێشێلکردنی ڕاستەوخۆی چوارچێوەی گرێبەستی پرۆژەی کۆرمۆر و دەستوەردانی بێپاساو لە ڕێکارە دامەزراوەییەکانی نێوان هەولێر و بەغدا هەژمار دەکرێت.
ڕەتکردنەوەی بانگەشەی کۆمپانیاکان
حکومەتی هەرێم بە تەواوی ئەو ئاماژانە ڕەتدەکاتەوە کە گوایە پاڵپشتی لەم هەنگاوە کردبێت و ئاماژەدان بە پشتیوانیی حکومەت بە “ناڕاست و چەواشەکارانە” دەناسێنێت.
پێویستیی ناوخۆیی بۆ غاز
لە ڕاگەیەندراوەکەدا جەخت کراوەتەوە کە حکومەت چەندین جار داوای گازی زیاتری بۆ وێستگەکانی هەرێم کردووە تا کارەبای زیاتر بۆ هەرێم و بەشەکانی دیکەی عێراق دابین بکات، بەڵام کۆمپانیاکان بە پێچەوانەی هاوکاری و بە شێوازی تاکلایەنە ڕەفتاریان کردووە.
گرتنەبەری ڕێکاری یاسایی حکومەتی هەرێمی کوردستان ڕایگەیاندووە کە ئێستا لە قۆناغی هەڵسەنگاندنی لێکەوتە یاسایی، گرێبەستی و کارپێکردنەکانی ئەم کردارەی کۆمپانیاکاندایە و تەواوی ڕێوشوێنە پێویستەکان بۆ پاراستنی مافە دەستوورییەکانی و بەرژەوەندییەکانی خەڵکی هەرێم و عێراق دەگرێتەبەر.
