سبەی لە سەرانسەری عێراق خۆپێشاندانی بەرفراوان ئەنجام دەدرێت
خۆپیشاندانی عێراق
SNN
بڕیارە سبەی لە سەرانسەری عێراق جووتیاران بڕژێنە سەر شەقامەكان و دژی وەزارەتی بازرگانیی عێراق خۆپێشاندان بكەن، بە ئەگەرێكی زۆریشەوە مانگرتن رادەگەیەنرێت.
ئەمڕۆ یەكشەم نۆی ئاب، سەدرەدین حوسێن ئەندامی كۆمەڵەی جووتیارانی مەخموور، راگەیاند، سبەی لە سەرانسەری عێراق خۆپێشاندانی فراوان دژی حكوومەتی عێراق و بەدیاریكراوی وەزارەتی بازرگانی ئەنجام دەدرێت
وتیشی، خۆپێشاندانەكە بەهۆی دواكەوتنی شایستە داراییەكانی جووتیارانە كە تا ئێستە نازانرێت كەی وەریدەگرین.
باسی لەوەش كرد، بەشێك لە پارەی گەنمی ساڵی 2025 لەلای عێراق ماوە و چارەنووسی پارەی ساڵی 2026یش نادیارە، بۆیە ئێمە داوای مافی خۆمان دەكەین.
روونی كردەوە، سبەی جگە لەوەی بەشێكی زۆری جووتیاران دەچنە بەردەم باڵەخانەی وەزارەتی بازرگانی، لە هەمان كاتدا لە تەواوی پارێزگاكان خۆپێشاندان ئەنجام دەدرێت و جووتیاران داوای مافی خۆیان دەكەن.
