شارەزایەکی کەشناسی: سۆپەر ئێل نینۆ بەڕێوەیە و باران و لافاوی لەگەڵدایە

SNN-

شارەزایەکی بواری کەشناسی هۆشداری دەدات لە نزیکبوونەوەی دیاردەیەکی دەگمەن و مێژوویی بە ناوی “سۆپەر ئێل نینۆ”، و پێشبینی دەکات کە ئەم دیاردەیە ببێتە هۆی دابارینێکی زۆر، دروستبوونی لافاو و هاتنی پایزێکی پێشوەختە لە هەرێمی کوردستان، عێراق و ناوچەکانی ڕۆژهەڵاتی ناوەڕاستدا.

شاڵاو هیدایەت، کە شارەزای کەشناسییە، لەسەر بنەمای بەراوردکاریی وێنەکانی دیاردەی ئێل نینۆ لە ڕێکەوتی 13ی ئابی ساڵانی 1997 و 2026 ئاماژەی بەوە کردووە کە هێزی ئێل نینۆی ئەم وەرزە لە ساڵی 1997 زیاترە و بەردەوامیش لە پەرەسەندندایە. پێشبینییەکانیش ئەوە دەگەیەنن کە لە مانگەکانی داهاتوودا، بەتایبەت لە نۆڤمبەر و دیسێمبەری ئەمساڵدا، دیاردەکە بگاتە ئاستی “سۆپەر ئێل نینۆ”یەکی مێژوویی و بێوێنە کە لە تۆمارەکانی پێشوودا بەو پلە بەرزە ڕووی نەدابێت.

سەبارەت بە کاریگەرییە جیهانییەکانی، چاوەڕوان دەکرێت دیاردەکە لەلایەک وشکەساڵییەکی توند لە هەندێک ناوچەی جیهان دروست بکات، و لە بەرامبەریشدا لە عێراق و هەرێمی کوردستاندا ببێتە هۆی بارانبارینی سەرووی نۆڕماڵ، تەرزەی قەبارە گەورە و هاتنی پایزێکی دەگمەن.

دەشڵێت: وەرزی سۆپەر ئێل نینۆی (1997 – 1998) بەیەکێک لە بەهێزترین و زیانبەخشترین ڕووداوەکانی سەدەی ڕابردوو دادەنرێت، و دوایین جار کە دیاردەکە بەو هێزە گەورەیە دەرکەوتبێت لە وەرزی (2015 – 2016)دا بووە.